छत्तीसगडमधील रायपूर येथे एक हृदयद्रावक घटना समोर आली आहे. एक व्यक्ती आपल्या मुलांना घेऊन मॉलमध्ये गेला होता. पण त्याच दरम्यान एस्केलेटरवर चढत असताना वडिलांच्या हातून चुकून एक वर्षांचा चिमुकला निसटला आणि तो थेट 40 फूट खाली पडल्याची घटना घडली. रुग्णालयात उपचारादरम्यान चिमुकल्याचा मृत्यू झाला.
मिळालेल्या माहितीनुसार, रायपूरच्या प्रसिद्ध शॉपिंग मॉलमध्ये मंगळवारी ही घटना घडली.रायपूर सिटी सेंट्रल मॉलच्या सीसीटीव्ही फुटेजमध्ये एक व्यक्ती आपल्या मुलाला उचलून घेऊन उभा असल्याचं दिसत आहे आणि त्याचा आणखी एक मुलगा देखील त्याच्यासोबत होता. यावेळी वडील आपल्या 5 वर्षांच्या मुलाला एस्केलेटरवरून वर नेण्याचा प्रयत्न करत होते.
एस्केलेटरवर चढताना एका मुलाला सावरण्याच्या नादात त्यांच्या हातात असलेला दुसरा मुलगा अचानक हातातून निसटला आणि उंचावरून खाली पडला. त्यानंतर लगेचच या चिमुकल्याला रुग्णालयात दाखल करण्यात आलं, तेथे उपचारादरम्यान त्याचा मृत्यू झाला. या घटनेने सर्वांनाच मोठा धक्का बसला असून अंगावर काटा आणणाऱ्या या घटनेचा व्हिडीओ सोशल मीडियावर व्हायरल होत आहे.