हैदराबाद - तेलंगणामध्ये ग्रामस्थांनी पोलिसांना अमानुष मारहाण केल्याची धक्कादायक घटना समोर आली आहे. मारहाण करणारे तेलंगाणा राष्ट्र समितीचे कार्यकर्ते आहे. तर यात मारहाण करणाऱ्यांपैकी एक जन स्थानिक आमदाराचा भाऊ असल्याची माहिती समोर आली आहे. आसिफाबाद जिल्‍ह्‍यात वृक्षारोपणासाठी आलेल्‍या पोलिस दल आणि वन रक्षकांच्‍या टीमला जमावाने लक्ष्य करत मारहाण केली, यात महिला पोलिस जखमी झाल्याचे वृत्त आहे.
आसिफाबाद जिल्‍ह्‍यात सिरपूर कागज नगर येथे वृक्षारोपण करण्यासाठी वन रक्षक आणि पोलीस दलाचे अधिकारी,कर्मचारी गेले होते. याचवेळी तेलंगणा राष्ट्र समितीच्या कार्यकर्त्यांनी अचानक हल्ला चढवला त्यामुळे पोलीस कर्माचाऱ्यांना बचाव करता आला नाही. यावेळी जमावातील लोकांनी ट्रॅक्टरवर लाठ्याकाठ्या ने मारत तोडफोड करणे सुरु केली. याचवेळी एक महिला पोलीस कर्मचारी ट्रॅक्टरवर उभी राहून चालकाला वाचवण्याचा प्रयत्न करत होती . ग्रामस्थांनी तिच्यावर काठीने हल्ला केला. विशेष म्हणजे या महिलेला मारहाण करणारा कोनेरू कृष्णा नावाचा व्यक्ती स्थानिक आमदारचा भाऊ असल्याचे बोलले जात आहे.
ह्या घटनेचा व्हिडीओ सोशल मिडीयावर प्रचंड वायरल झाला आहे. मारहाण करणाऱ्या राजकीय कार्यकर्त्यांवर मोठ्याप्रमाणात टीका करण्यात येत आहे. मध्यप्रदेश मधील भाजप आमदाराने प्रशासकीय अधिकाऱ्याला चक्क बॅटनं मारहाण केल्याची घटना ताजी असतानाच, आता पोलीस आणि वन रक्षक दलाच्या टीमवर तेलंगणामध्ये राजकीय कार्यकर्त्यांकडून हल्ला करण्यात आला आहे.