जम्मू-काश्मीरमधील पहलगाम येथे झालेल्या हल्ल्यानंतर सुरक्षायंत्रणांनी दहशतवादाविरोधातील मोहीम अधिक आक्रमक केली आहे. या पार्श्वभूमीवर डोडा जिल्ह्यात चार जणांवर दहशतवाद्यांना सहकार्य केल्याप्रकरणी विशेष एनआयए न्यायालयाने गंभीर आरोप निश्चित केले आहेत. या आरोपींवर बेकायदेशीर क्रियाकलाप प्रतिबंधक कायदा (UAPA) आणि भारतीय दंड संहिता अंतर्गत विविध गुन्हे दाखल करण्यात आले आहेत.
कोण आहेत 'ते' चार?
गेल्या वर्षी १६ जुलै रोजी देसा पोलीस ठाण्यात दाखल करण्यात आलेल्या गुन्ह्यानंतर आता या चौघांविरोधातील खटल्याला अधिक बळ मिळाले आहे. या आरोपींमध्ये मालवासचा मुनीर हुसेन, कुलहंदचा तनवीर अहमद, बग्गर-अस्सारचा नूर आलम आणि हेरानी गावातील कुंज लाल यांचा समावेश आहे.
दाखल झाले गुन्हे!
अधिकाऱ्यांनी दिलेल्या माहितीनुसार, या चौघांनी डोडा परिसरातील दहशतवाद्यांना अन्न, निवारा आणि इतर आवश्यक गोष्टी पुरवून त्यांना थेट किंवा अप्रत्यक्षरीत्या मदत केली होती. यावरून पोलिसांनी त्यांच्याविरोधात UAPA अंतर्गत कलम १३ (बेकायदेशीर क्रियाकलाप), १६ (दहशतवादी कृत्य), १९ (दहशतवाद्यांना आश्रय), आणि २० (दहशतवादी संघटनेचे सदस्यत्व) तसेच भारतीय न्याय संहिता अंतर्गत कलम १०३ (खून), १४७ (भारत सरकारविरोधात युद्ध पुकारणे), १४९ (गैरकायदेशीर जमाव) आणि ३१५ (मालमत्तेचा अप्रामाणिक गैरवापर) अशा गंभीर कलमांतर्गत गुन्हे दाखल केले.
आरोपींकडून मिळाले पुरावे
डोडाचे वरिष्ठ पोलिस अधीक्षक संदीप मेहता यांनी सांगितले की, "या प्रकरणाचा तपास व्यावसायिक पद्धतीने केला गेला असून, आरोपींकडून मिळालेल्या पुराव्यांवरून न्यायालयाने त्यांच्यावरील आरोप निश्चित केले आहेत."
सध्या हे चारही आरोपी न्यायालयीन कोठडीत आहेत. विशेष एनआयए न्यायालयाचे अतिरिक्त जिल्हा व सत्र न्यायाधीश (फास्ट ट्रॅक कोर्ट) यांनी पुराव्यांचा आढावा घेतल्यानंतर आरोप निश्चित केले असून, पुढील खटला लवकरच सुरू होणार आहे.