Lok sabha Election Result 2024 : केरळमधील तिरुवनंतपुरम लोकसभेची जागा हायव्होल्टेज आहे. इथून काँग्रेसकडून शशी थरूर तर भाजपकडून राजीव चंद्रशेखर लोकसभेच्या मैदानात आहेत. केरळमधील २० लोकसभेच्या जागांपैकी सर्वात प्रतिष्ठित जागांपैकी ही एक आहे. सुरुवातीच्या कलांनुसार भाजप उमेदवार राजीव चंद्रशेखर यांनी चांगली आघाडी घेतली आहे. त्यांनी २४,११८ मतांची आघाडी घेतली असून हा शशी थरूर यांच्यासाठी मोठा धक्का आहे. थरूर मोठ्या फरकाने पिछाडीवर आहेत. या जागेवरून २००९ पासून थरूर खासदार बनले आहेत. (Thiruvananthapuram Seat Election Result 2024)
दरम्यान, २०१९ मध्ये माजी परराष्ट्र व्यवहार राज्यमंत्री शशी थरूर यांनी काँग्रेसच्या तिकिटावर ही जागा जिंकली होती. या निवडणुकीत काँग्रेसचे उमेदवार थरूर यांना ४,१६,१३१ मते मिळाली. थरूर यांना एकूण ४१.१५% लोकांची मते मिळाली. मागील वेळी भाजपा या जागेवर दुसऱ्या क्रमांकावर होती. पक्षाचे उमेदवार कुम्मनम राजशेखरन यांना ३,१६,१४२ म्हणजेच ३१.२६% मते मिळाली. अशाप्रकारे २०१९ च्या लोकसभा निवडणुकीत काँग्रेस नेते शशी थरूर यांनी ९९,९८९ मतांनी विजय मिळवला.
थरूरांच्या विरोधात केंद्रीय मंत्रीमोदी सरकारमध्ये राजीव हे कौशल्य विकास आणि उद्योजकता मंत्रालय, इलेक्ट्रॉनिक्स आणि माहिती तंत्रज्ञान मंत्रालय तसेच जलशक्ती मंत्रालयात राज्यमंत्री आहेत. ते भाजपाचे राज्यसभा खासदार असून उद्योजक अशीही त्यांची ओळख आहे. राजीव हे एप्रिल २००६ पासून कर्नाटकमधून राज्यसभेचे सदस्य होते. एप्रिल २०१८ मध्ये ते भाजपाचे सदस्य म्हणून तिसऱ्यांदा सहा वर्षांच्या कालावधीसाठी कर्नाटकमधून राज्यसभेवर पुन्हा निवडून आले.
शशी थरूर सध्या तिरुवनंतपुरम मतदारसंघाचे प्रतिनिधित्व करत आहेत. ते २०१९ मध्ये तिसऱ्यांदा लोकसभेत खासदार म्हणून निवडून गेले. त्यांनी यापूर्वी केंद्र सरकारमध्ये मनुष्यबळ विकास राज्यमंत्री आणि परराष्ट्र व्यवहार राज्यमंत्री म्हणून काम पाहिले आहे. थरूर यांची संयुक्त राष्ट्रात जवळपास तीन दशकांची कारकीर्द होती. त्यामुळे ते खासदारकीचा चौकार मारणार का हे पाहण्याजोगे असेल.
भाजप उमेदवार चंद्रशेखर प्रथमच लोकसभेच्या मैदानातउद्योगपती आणि तंत्रस्नेही असलेले राजीव चंद्रशेखर हे केंद्रीय कौशल्य विकास आणि उद्योग राज्यमंत्री आहेत. ते २००६ पासून सलग तीनवेळा कर्नाटकातून राज्यसभा सदस्य आहेत. २०१९ मध्ये भाजप या मतदारसंघात दुसऱ्या क्रमांकावर होता. दक्षिणेत भाजपचा पाया मजबूत करण्यासाठी भाजपचे प्रयत्न चालू आहेत. त्याचाच एक भाग म्हणून चंद्रशेखर यांना प्रथमच लोकसभेच्या मैदानात उतरविण्यात आले आहे.