जम्मू-काश्मीर : जम्मू-काश्मीरमधील सोपोरमध्ये दहशतवाद्यांकडून ग्रेनेड हल्ला करण्यात आला. या हल्ल्यात 20 जण जखमी झाल्याचे समजते.
मिळालेल्या माहितीनुसार, जम्मू-काश्मीरमधील सोपोर येथील हॉटेल प्लाझाजवळ संध्याकाळी सव्वा चारच्या सुमारास दहशतवाद्यांनी ग्रेनेड हल्ला केला. या हल्ल्यात 20 नागरिक जखमी झाले आहेत. त्यातील 6 जणांची प्रकृती गंभीर असल्याचे सांगण्यात आले. दरम्यान, घटनास्थळी सीआरपीएफचे जवान दाखल झाले असून या परिसराला घेराव घातला आहे. तसेच, दहशतवाद्यांचा शोध सुरु आहे.
याआधी श्रीनगरमधील करणनगर परिसरात सीआरपीएफ आणि पोलीस यांच्या संयुक्त पेट्रोलिंग पार्टीवर दहशतवाद्यांनी हल्ला केला होता. त्यावेळीही दहशतवाद्यांनी जवानांवर ग्रेनेड फेकले होते. हा हल्ला संध्याकाळी सात वाजताच्या सुमारास करण्यात आला होता. यात सहा सीआरपीएफचे जवान जखमी झाले होते.