श्रीनगर - जम्मू काश्मीरच्या बारामुल्ला जिल्ह्यात घुसखोरी करणाऱ्या एका दहशतवाद्याचा खात्मा करण्यात भारतीय जवानांना यश आलं आहे. लष्कराच्या जवानांनी धडक कारवाई करत बारामूलाच्या कस्तुरी नार येथील नियंत्रण रेषेजवळील दहशतवाद्यांचा घुसखोरीचा प्रयत्न उधळून लावला आहे. दहशतवाद्यांच्या गोळीबाराला चोख प्रत्युत्तर देत जवानांनी आतापर्यंत चार अतिरेक्यांना कंठस्नान घातलं असून अजूनही चकमक सुरू आहे.
शनिवारी (18 ऑगस्ट) भारतीय जवानांनी जम्मू काश्मीरच्या कुपवाडा जिल्ह्यातील तंगधार सेक्टरमध्ये तीन दहशतवाद्यांचा खात्मा केला. हे दहशतवादी कुपवाडा जिल्ह्यातील तंगधार सेक्टरजवळ नियंत्रण रेषा पार करून घुसखोरी करण्याचा प्रयत्न करत होते. भारतीय जवानांना शनिवारी संध्याकाळी नियंत्रण रेषेजवळ काही संशयास्पद हालचाली दिसल्या. त्यानंतर जवानांनी शोधमोहिम सुरू केली. त्याचदरम्यान घुसखोरी करण्याचा प्रयत्न करणाऱ्या दहशतवाद्यांनी जवानांवर गोळीबार सुरू केला. यावेळी झालेल्या चकमकीत तीन दहशतवाद्यांना कंठस्नान घालण्यात भारतीय जवानांना यश आले आहे.