अलाहाबाद - देशभरातील गुन्हेगारीचा आकडा दिवसेंदिवस वाढत चालला आहे. लोकांमध्ये कायद्याची भीती राहिलेली नसून अशीच एक धक्कादायक घटना समोर आली आहे, ज्यामध्ये एका 26 वर्षीय तरुणाची भररस्त्यात हत्या करण्यात आली. मारहाण केल्यानंतर तरुण बेशुद्ध पडला असतानाही त्याच्यावर विटा, काठी आणि लोखंडी रॉडने वार करण्यात आले. कोमात गेलेल्या तरुणाचा रुग्णालयातच मृत्यू झाला. पोलिसांनी याप्रकरणी एकाला अटक केली असून, मुख्य आरोपी मात्र फरार आहे. अलाहाबादमध्ये ही घटना घडली आहे.
हत्या करण्यात आलेल्या तरुणाचं नाव दिलीप सरोज असं आहे. दिलीप आपल्या दोन मित्रांसोबत रेस्टॉरंटमध्ये डिनरसाठी गेला होता. यावेळी काही लोकांसोबत त्याची शाब्दिक चकमक झाली होती. त्यानंतर त्यांनी दिलीपवर हल्ला करत त्याची हत्या करुन टाकली. दिलीप बेशुद्द पडला असतानाही त्याच्यावर हल्ला होत असतानाचा व्हिडीओ एक व्यक्तीने शूट केला आहे. या व्हिडीओत बेशुद्ध अवस्थेतही दिलीपवर विटा फेकल्या जात असून लोखंडी रॉड आणि हॉकी स्टिकने मारहाण होत असल्याचं दिसत आहे.
ही दृश्यं विचलित करु शकतात
हल्ला करणारे सर्वजण दारुच्या नशेत असल्याची शक्यता आहे. विशेष म्हणजे भररस्त्यात ही घटना घडत असतानाही तेथून जाणारी एकही व्यक्ती मदतीसाठी पुढे आली नाही. ज्यांनी व्हिडीओ काढला त्यांनीदेखील मदत केली की नाही हे कळू शकलं नाही.
दिलीपचा मित्र प्रकाश सिंह या घटनेचा साक्षीदार असून त्याने सांगितलं की, 'आम्ही डिनरसाठी कालिका रेस्टॉरंटमध्ये गेला होतो. डिनरनंतर आम्ही रेस्टॉरंटच्या पाय-यांवर बसलो होतो. त्यावेळी तिघे आले आणि आम्हाला धक्काबुक्की करत, शिव्या देत रेस्टॉरंटमध्ये निघून गेले. आम्ही त्यांच्यामागून गेलो आणि जाब विचारला असता त्यांनी मारहाण करण्यास सुरुवात केली. त्यांनी माझ्यावर खुर्ची फेकली. पण मी तेथू निसटलो'.
व्हिडीओत लेदर जॅकेटमध्ये दिसणारी व्यक्ती रेस्टॉरंटचा मालक असल्याची माहिती मिळाली असून, तो मारेक-याला थांबवण्याचा प्रयत्न करत आहे. नंतर तरुणाचा मृतदेह बाईकवरुन नेण्याचाही तो प्रयत्न करत आहे. पण दुर्देवाने दिलीप कोमात गेला होता, आणि रुग्णालयात त्याचा मृत्यू झाला. पोलिसांनी रेस्टॉरंटच्या एका वेटरला अटक केली असून मुख्य आरोपी विजय शंकर सिंह मात्र फरार आहे.