श्रीनगरमध्ये सुरक्षा दलाच्या गस्ती पथकावर हल्ला, चकमकीत तीन दहशतवादी ठार, एक जवान शहीद

अधिका-यांच्या म्हणण्यानुसार एन्काऊंटर संपला आहे. तिन्ही दहशतवादी ठार झाले आहेत. दहशतवाद्यांची ओळख अद्याप पटलेली नाही. परिसरात शोधमोहीम सुरू आहे.

जम्मू-काश्मीरमधील श्रीनगरमध्ये 29-30 ऑगस्टला रात्री उशिरा दहशतवाद्यांनी स्थानिक पोलीस आणि केंद्रीय राखीव पोलीस दलाच्या (सीआरपीएफ) गस्ती पथकावर हल्ला केला. यानंतर सुरू झालेल्या चकमकीत जम्मू-काश्मीर पोलीस आणि सीआरपीएफने तीन दहशतवाद्यांचा खात्मा केला. जम्मू-काश्मीर पोलिसांचे सहाय्यक उपनिरीक्षकही चकमकीत शहीद झाले.श्रीनगर जिल्ह्यातील पंथ चौक भागात ही चकमक झाली. यासंदर्भात एका पोलीस अधिका-याने सांगितले की, खात्मा करण्यात आलेल्या अतिरेक्यांचे मृतदेह सापडले आहेत. ठार झालेल्या अतिरेक्यांकडून शस्त्रे आणि दारूगोळा जप्त करण्यात आला आहे. अधिका-यांच्या म्हणण्यानुसार एन्काऊंटर संपला आहे. तिन्ही दहशतवादी ठार झाले आहेत. दहशतवाद्यांची ओळख अद्याप पटलेली नाही. परिसरात शोधमोहीम सुरू आहे.29-30 ऑगस्ट रोजी रात्री उशिरा जम्मू-काश्मीर पोलीस आणि सीआरपीएफच्या संयुक्त पथकावर तीन दहशतवाद्यांनी हल्ला केल्याचे सांगितले जात आहे. हे दहशतवादी दुचाकीवरून आले होते. विशेष म्हणजे जम्मू-काश्मीरमध्ये लष्करी सैन्याने दहशतवाद्यांविरुद्ध मोहीम उघडली आहे. राज्यातील काही भागातून दररोज चकमकीचे अहवाल येत आहेत. गेल्या दोन दिवसांतील चकमकीची ही तिसरी घटना आहे. जम्मू-काश्मीरच्या पुलवामा जिल्ह्यातही सुरक्षा दलाची दहशतवाद्यांशी आधी 28 तारखेला आणि नंतर  29 ऑगस्ट रोजी चकमकी झाल्यात.