Shraddha Murder Case, Aftab: सध्या देशात श्रद्धा वालकर हत्या प्रकरणाची भरपूर चर्चा आहे. महाराष्ट्रातील वसईच्या श्रद्धा वालकर हत्या प्रकरणाने संपूर्ण देश हादरला आहे. तिचा प्रियकर आफताब आमीन पुनावाला (Aftab Poonawala) याने तिची आधी हत्या केली आणि त्यानंतर तिच्या मृतदेहाचे ३५ तुकडे केल्याची धक्कादायक घटना काही दिवसांपूर्वीच उघडकीस आली. श्रद्धा आफताब बरोबर दिल्लीत शिफ्ट झाल्यानंतर त्यांच्यात मतभेद झाले आणि त्यातून आफताबने टोकाचे पाऊल उचलले असे सांगितले जात आहे. या प्रकरणानंतर आफताबबद्दल संतप्त प्रतिक्रिया उमटताना दिसत आहेत. ‘देशाला आफताब नकोय तर 'लव्ह जिहाद' (Love Jihad) विरोधात कायदा हवा आहे. देशाला रामासारखा (Lord Ram) देव अन् मोदींसारखा (PM Modi) नेता हवाय’, असे विधान भाजपा नेते आणि आसामचे मुख्यमंत्री हिमंता बिस्वा सरमा (Assam CM Himanta Biswa Sarma) यांनी केले.
दिल्ली एमसीडी निवडणुकीत आम आदमी पार्टी (आप), भाजप (भाजप) आणि काँग्रेस (काँग्रेस) आमनेसामने आहेत. तिन्ही पक्ष प्रचारात गुंतले आहेत. आम आदमी पार्टीचे प्रमुख अरविंद केजरीवाल यांनी 20 नोव्हेंबर रोजी स्ट्रीट कॉर्नर सभा घेतली, तर आसामचे मुख्यमंत्री हिमंता बिस्वा सरमा यांनी खासदार मनोज तिवारी यांच्यासह भाजपच्या वतीने रोड शो केला. त्यावेळी त्यांनी लव्ह जिहादविरोधात कायदा करण्याची मागणी केली.
आसामचे मुख्यमंत्री हिमंता बिस्वा सरमा यांनी रोड शो दरम्यान लोकांना संबोधित करताना भाजप उमेदवारांना विजयी करण्याचे आवाहन केले. यासोबतच श्रद्धा मर्डर केसमधील आरोपी आफताबचा (आफताब अमीन पूनावाला) उल्लेख करून त्यांनी लव्ह जिहादविरोधात कायदा व्हायला हवा असे म्हटले. ते म्हणाले, “आपल्याला दिल्ली वाचवायची आहे, देश वाचवायचा आहे. कोणावरही अत्याचार करणार नाही अशी शक्ती निर्माण करायची आहे. देशातील जनतेवर कुणालाही जुलूम करता येऊ नये."
"आपल्या देशाला आफताब नकोय, आपल्या देशाला प्रभू श्रीरामसारख्या देवाची गरज आहे. पंतप्रधान नरेंद्र मोदींसारख्या नेत्याची गरज आहे. आपल्या देशाला कॉमन सिव्हिल कोड (समान नागरी कायदा) हवाय आणि लव्ह जिहादविरोधातील कायद्याची गरज आहे. जर कोणी आफताब निघाला तर त्याला थेट फाशी द्या, आपल्या देशाला अशा कायद्याचीच गरज आहे," असे ते स्पष्टपणे म्हणाले.
हिमंता बिस्वा सरमा यांच्या या विधानावर लोकांनी सोशल मीडियावर कमेंट करत, तुमचेच सरकार असल्याची त्यांना आठवण करून दिली. देशात तुमचेच सरकार आहे, तुम्ही लव्ह जिहादविरोधात कायदा का बनवत नाही, तुम्हाला कोण रोखत आहे? अशा शब्दांत त्यांना सवाल करण्यात आले.