मुंबई : एअर इंडियाच्या विमानात पुन्हा एकदा धक्कादायक घटना समोर आली आहे. मुंबईहून दिल्लीला जाणाऱ्या विमानात एका प्रवाशाने लघुशंका आणि शौच केली. इतकेच नाही तर यानंतर तो विमानात थुंकत राहिला. ही घटना 24 जूनची आहे. राम सिंह असे आरोपीचे नाव असून त्याला दिल्लीच्या IGI पोलिसांकडे (इंदिरा गांधी आंतरराष्ट्रीय विमानतळ) सोपवण्यात आले आहे.
दिल्ली पोलिसांनी आरोपीविरुद्ध कलम 294/510 अंतर्गत गुन्हा दाखल करून अटक केली आहे. पोलिसांनी दिलेल्या माहितीनुसार, ही घटना फ्लाइट क्रमांक AIC866 मध्ये घडली आहे. या प्रवाशाने केबिन क्रू मेंबर आणि इतर प्रवाशांसोबत वादही घातला. बराच वेळ हा गोंधळ सुरू होता. यासंदर्भात क्रू मेंबरने तातडीने विमानाच्या पायलटला आणि एअर इंडिया सिक्योरिटीला याबाबतची माहिती दिली.
प्रवाशी राम सिंह दिल्लीत उतरताच त्याला आयजीआय विमानतळ पोलीस ठाण्याच्या पोलिसांच्या ताब्यात देण्यात आले. पोलिसांनी गुन्हा दाखल करून आरोपीला अटक केली आहे. 24 जून 2023 रोजी मुंबईहून दिल्लीला येणाऱ्या एअर इंडियाच्या AIC 866 फ्लाइटमध्ये प्रवासी राम सिंह सीट क्रमांक 17F वर बसला होता. तिथेच त्याने शौच केले आणि लघुशंका केली, असे पोलिसांनी सांगितले.
विमानाच्या केबिन क्रूने या घटनेवर आक्षेप घेतला. प्रवाशाला तिथून हटवण्यात आले. केबिन क्रू अमन वत्स यांनी पायलट-इन-कमांड कॅप्टन वरुण संसारे यांना घटनेची माहिती दिली. याची माहिती तातडीने एअर इंडियाला पाठवण्यात आली. विमान उतरताच प्रवाशाला सुरक्षा कर्मचाऱ्यांच्या ताब्यात देण्यात आले. या घटनेवर विमानातील इतर प्रवाशांनीही नाराजी व्यक्त केली. दरम्यान, याआधीही विमानात प्रवाशांनी लघुशंका केल्याचे प्रकार समोर आले आहेत.