काळवीट शिकार प्रकरण : सलमान खानला आज न्यायालयात हजर राहण्याचे आदेश

काळवीट शिकार प्रकरणी अभिनेता सलमान खानला शुक्रवारी जोधपूर न्यायालयात हजर राहण्याचे आदेश देण्यात आले आहेत.

ठळक मुद्देकाळवीट शिकार प्रकरणी अभिनेता सलमान खानला शुक्रवारी जोधपूर न्यायालयात हजर राहण्याचे आदेश देण्यात आले आहेत. जिल्हा सत्र न्यायालयात आज या प्रकरणाची सुनावणी होणार आहे. सलमान जर आज न्यायालयात हजर राहीला नाही तर त्याच्या अडचणीत वाढ होण्याची शक्यता आहे.

जोधपूर - काळवीट शिकार प्रकरणी अभिनेता सलमान खानला शुक्रवारी (27 सप्टेंबर) जोधपूर न्यायालयात हजर राहण्याचे आदेश देण्यात आले आहेत. जिल्हा सत्र न्यायालयात आज या प्रकरणाची सुनावणी होणार आहे. सलमान जर आज न्यायालयात हजर राहीला नाही तर त्याच्या अडचणीत वाढ होण्याची शक्यता आहे. न्यायालय त्याचा जामीन रद्द करू शकतं. 

अभिनेता सलमान खानलाकाळवीट शिकार प्रकरणीजोधपूर न्यायालयाने काही महिन्यांपूर्वी दोषी ठरवले होते. याप्रकरणी त्याला पाच वर्षांचा तुरुंगवास आणि 10 हजारांच्या दंडाची शिक्षा सुनावण्यात आली होती. 5 एप्रिल 2018  न्यायालयाने हा निकाल दिला होता. ही शिक्षा माफ व्हावी यासाठी सलमानच्या वकिलांकडून जोधपूर न्यायालयात निवेदन करण्यात आले असून सध्या ही केस सुरू आहे. पण सलमानची या खटल्यातून अद्याप तरी सुटका झालेली नाही. याउलट दिवसेंदिवस सलमानच्या अडचणीत वाढ होत आहे.

सलमान न्यायालयात हजर राहत नसल्याने न्यायाधीशांनी आता नाराजी व्यक्त केली आहे. मागील सुनावणी दरम्यान न्यायाधीशांनी या तारखेला सलमानच्या वकिलांना सांगितले होते की, सलमानने पुढील तारखेला न्यायालयात हजर राहावे अन्यथा त्याचा जामीन फेटाळला जाईल. गेल्या तारखेला देखील सलमानने न्यायालयात हजेरी लावली नव्हती, त्यावेळी सलमानला न्यायालयात हजर राहाण्याविषयी सलमानच्या वकिलांना सांगण्यात आले होते. पण तरीही सलमान या तारखेला देखील उपस्थित राहिला नसल्याने न्यायाधीशांनी त्याच्या वकिलांना सक्त ताकीद दिली होती. त्यामुळे आजच्या सुनावणीला सलमान न्यायालयात हजर राहिला नाही तर त्याच्या अडचणीत वाढ होऊ शकते. 

हम साथ साथ है या चित्रपटाचे चित्रीकरण राजस्थानमध्ये सुरू असताना सलमान आणि या चित्रपटातील त्याच्या काही सहकलाकारांनी काळवीटाची शिकार केली असल्याचा त्यांच्यावर आरोप लावण्यात आला होता. या प्रकरणात सलमानला दोषी ठरवण्यात आले असले तरी त्याचे सहकलाकार अभिनेता सैफ अली खान, सोनाली बेंद्रे, तब्बू आणि नीलम यांना निर्दोष ठरवण्यात आले होते. सलमानला जीवे मारण्याची धमकी देण्यात आल्याची माहिती मिळत आहे. राजस्थान पोलिसांनी या प्रकाराची दखल घेतली असून चौकशीही सुरू केली आहे. याप्रकरणी पोलीस उपायुक्त डी. सिंह यांनी अशा प्रकारे धमकी देणाऱ्यांमागे कोण आहे हे शोधण्याचे काम आम्ही करीत आहोत. जर ते कोण आहेत हे समजले तर आम्ही योग्य ती कारवाई करू. त्याचबरोबर कोणताही अनुचित प्रकार घडू नये यासाठी खबरदारी घेतली जाईल अशी माहिती दिली आहे.