नवी दिल्ली - उत्तराखंडचे नवे मुख्यमंत्री तीरथ सिंह रावत (Tirath Singh Rawat) यांच्यावर सध्या वादग्रस्त विधानामुळे जोरदार टीका होत आहे. एका कार्यक्रमामध्ये मुख्यमंत्री रावत यांनी महिला वापरत असलेल्या जीन्सवर विधान केलं असून यामुळे नवा वाद निर्माण झाला आहे. रावत आपल्या एका विधानामुळे खूपच चर्चेत आले आहेत. "आजकाल महिला फाटलेल्या जीन्स घालून फिरतात, हे सगळं बरोबर आहे का? हे कसले संस्कार आहेत" असं तीरथ सिंह रावत यांनी म्हटलं होतं. यानंतर सर्वांनी यावरून निशाणा साधत हल्लाबोल केला आहे. याच दरम्यान सोशल मीडियावर एक फोटो जोरदार व्हायरल होत आहे. तीरथ सिंह रावत यांच्या मुलीनेच फाटकी जीन्स घातल्याचं म्हटलं जात आहे.
मुख्यमंत्र्याच्या मुलीनेच फाटलेली जीन्स परिधान केल्याचा दावा व्हायरल होणाऱ्या फोटोमधून करण्यात येत आहे. 'चक दे' (Check De) फेम अभिनेत्री चित्राशी रावतचा (Actress Chitrashi Rawat) चा तो फोटो असून सध्या तो तुफान व्हायरल होतं आहे. ज्यामध्ये तिने फाटलेली जीन्स परिधान केली आहे. हा फोटो व्हायरल होतं असतानाच चित्राशी रावत या वादग्रस्त विधान करणारे उत्तराखंडचे मुख्यमंत्री तीरथ सिंह रावत यांच्या कन्या आहेत असं म्हटलं जात आहे. मात्र आता स्वत: अभिनेत्री चित्राशी रावतने याबाबत मोठा खुलासा केला आहे.
"सध्या सोशल मीडियावर माझा एक फोटो खूप व्हायरल होतं आहे. ज्यामध्ये मी एक रिप्ड जीन्स परिधान केली आहे. हा फोटो व्हायरल होताना मी उत्तराखंडचे मुख्यमंत्री तीरथ सिंह रावत यांची मुलगी आहे असा दावा केला जात आहे. पण हे पूर्णपणे खोटं आहे. हे खरं आहे की माझ्या वडिलांचं नावही तीर्थ सिंह रावत आहे. त्यामुळे बऱ्याच लोकांचा गोंधळा उडाला आहे" अशी माहिती अभिनेत्री चित्राशी रावतने आजतकला प्रतिक्रिया देताना दिली आहे. सर्वच स्तरातून रावत यांच्यावर जोरदार टीका करण्यात आली. महिला नेत्यांनी यावरून निशाणा साधत टीकास्त्र सोडलं आहे. मात्र टीका झाल्यानंतरही रावत यांनी आपली भूमिका कायम ठेवली आहे.
"...तरीही फाटक्या जीन्स वापरण्याला माझा विरोध"; जोरदार टीकेनंतरही तीरथ सिंह रावत आपल्या विधानावर ठाम
तीरथ सिंह रावत यांनी फाटक्या जीन्सबाबत केलेल्या वादग्रस्त विधानावर आता पुन्हा एकदा आपली प्रतिक्रिया दिली आहे. "आपला महिलांनी जीन्स वापरण्याला विरोध नाही पण तरीही फाटक्या जीन्स वापरण्याला विरोध आहेच" असं रावत यांनी म्हटलं आहे. सर्वच स्तरातून टीका होत असताना रावत यांना त्यांच्या विधानाबद्दल विचारणा करण्यात आली. त्यावर माध्यमांशी बोलताना त्यांनी आपला महिलांनी फाटक्या जीन्स वापरण्याला विरोध कायम असल्याचं म्हटलं आहे. एका हिंदी वेबसाईटने याबाबतचे वृत्त दिले आहे. ट्विटरवर सध्या RippedJeans हा हॅशटॅग जोरदार ट्रेंड होत आहे.
बाल हक्क संरक्षण आयोगाच्या वतीने एका कार्यशाळेचं आयोजन करण्यात आलं होतं. याच दरम्यान बोलताना मुख्यमंत्री तीरथ सिंह रावत यांनी हे विधान केलं होतं. मुलांवर होणाऱ्या संस्कारला आईवडील जबाबदार असतात असं देखील ते म्हणाले आहेत. मुख्यमंत्री रावत यांनी त्यांचा प्रवासातील एक अनुभवही सांगितला. "एकदा मी विमानातून प्रवास करत होतो. त्यावेळी मी बघितलं की, एक महिला आपल्या दोन मुलांना घेऊन जवळच बसलेली होती. त्या महिलेने फाटलेली जीन्स घातलेली होती. मी त्या महिलेला विचारलं की कुठे जायचं? यावर ती महिला म्हणाली दिल्लीला."
"महिलेचा पती जेएनयूमध्ये प्राध्यापक आहे आणि ती महिला स्वयंसेवी संस्था चालवते. माझ्या मनात विचार आला, जी महिला एनजीओ चालवते आणि फाटलेली जीन्स घालून फिरते. अशी महिला समाजात कोणत्या संस्कृतीचा प्रसार करत असेल. जेव्हा आम्ही शाळेत होतो, तेव्हा असं नव्हतं" असंही रावत यांनी म्हटलं आहे. तसेच तरुणांमध्येही व्यसन वाढत चाललं आहे. नशेबरोबरच आपल्याला सर्व विकृतींपासून मुलांना दूर ठेवून संस्कारी बनवावं लागेल. तसेच पाश्चिमात्य संस्कृतीच्या प्रभावापासून दूर राहावं लागेल असं देखील रावत यांनी म्हटलं आहे. काही दिवसांवपूर्वी रावत यांनी पंतप्रधान मोदींची तुलना ही प्रभू रामासोबत केली होती.