राजस्थानचे आरोग्यमंत्री गजेंद्र सिंह खींवसर यांच्या पत्नी प्रीती कुमारी यांचं गुरुवारी सकाळी निधन झालं आहे. कुटुंबीयांनी दिलेल्या माहितीनुसार, बुधवारी रात्री जेवण करून त्या झोपण्यासाठी गेल्या होत्या. सकाळी उशिरापर्यंत त्या न उठल्याने कुटुंबीयांनी त्यांना उठवण्याचा प्रयत्न केला, परंतु कोणताही प्रतिसाद मिळाला नाही. त्यांना तातडीने उपचारासाठी जयपूरच्या दुर्लभजी रुग्णालयात नेण्यात आलं. मात्र डॉक्टरांनी त्यांना मृत घोषित केलं. त्यांच्या मृत्यूची बातमी कळताच संपूर्ण परिसरात शोककळा पसरली आहे.
डॉक्टरांनी दिलेल्या माहितीनुसार, प्रीती कुमारी यांना सायलेंट हार्ट अटॅक आला होता, ज्यामुळे त्यांचा झोपेतच मृत्यू झाला. सकाळी एक मेडिकल टीम मंत्र्यांच्या निवासस्थानी पोहोचली आणि त्यांच्यावर प्राथमिक उपचार करण्यात आले. परंतु त्यांच्या प्रकृतीत सुधारणा न झाल्याने त्यांना उपचारासाठी रुग्णालयात नेण्यात आले, जिथे त्यांना मृत घोषित करण्यात आलं.
गजेंद्र सिंह खींवसर आणि प्रीती कुमारी यांचं फेब्रुवारी १९८२ मध्ये लग्न झालं होतं. त्यांचा मुलगा धनंजय सिंह खींवसर हे जोधपूर क्रिकेट असोसिएशनचे अध्यक्ष आहेत. तसेच त्यांना एक मुलगी देखील आहे. कुटुंबातील जवळच्या लोकांनी प्रीती कुमारी अतिशय सौम्य आणि कुटुंबाभिमुख स्वभावाच्या होत्या असं सांगितलं आहे.
गजेंद्र सिंह खींवसर हे मंत्री आहेत. गुरुवारी त्यांना बिकानेरमध्ये अनेक कार्यक्रमांना उपस्थित राहायचे होतं, परंतु त्यांच्या पत्नीच्या निधनामुळे सर्व कार्यक्रम रद्द करण्यात आले आहेत. प्रीती कुमारी यांच्या आकस्मिक निधनामुळे राजकीय आणि सामाजिक वर्तुळात शोककळा पसरली आहे. अनेक नेत्यांनी आणि अधिकाऱ्यांनी शोक व्यक्त केला आहे.