राजा रघुवंशी हत्या प्रकरण सध्या देशभरात गाजत आहे. या हत्या प्रकरणी राजा रघुवंशी याची पत्नी सोनम हीच मुख्य आरोपी असल्याची माहिती समोर आल्याने अनेकांना धक्का बसला होता. मेघालय पोलिसांनी ऑपरेशन हनिमून अंतर्गत तपास करून नियोजनबद्धरीत्या करण्यात आलेल्या या हत्याकांडाचा एकेक घटनाक्रम समोर आणला आहे. तसेच या हत्येप्रकरणी सोनम आणि अन्य तीन आरोपींना बेड्या ठोकल्या आहेत. दरम्यान, हनिमूनसाठी मेघालयमध्ये गेल्यानंतर सोनमने कुठलाही फोटो अपलोड न करणे आणि राज्याच्या सोशल मीडिया अकाउंटवरून पोस्ट करणे या प्रकरणात पोलिसांसाठी महत्त्वाचा दुवा ठरले.
राजा रघुवंशी आणि सोनम हे नवविवाहित जोडपं हनिमूनसाठी शिलाँग येथे गेलं होतं. मात्र सोनमने या काळात एकही फोटो सोशल मीडियावर शेअर केला नव्हता, सर्वसाधारणपणे नवविवाहित जोडपी सोशल मीडियावर बरेच फोटो शेअर करत असतात. त्यामुळे ही बाब पोलिसांना खटकली. तसेच त्यांना सोनवमर संशय आला. मात्र राजाची हत्या केल्यानंतर त्याच्या सोशल मीडिया अकाऊंटवरून सोनमने दुपारी २.१५ च्या सुमारास एक पोस्ट केली. त्यात तिने साथ जन्मांची साथ आहे..., असं लिहिलं होतं. खरंतर ही पोस्ट पोलिसांचं तपासापासूनचं लक्ष विचलित करण्यसाठी करण्यात आली होती.
दरम्यान, पोलिसांनी घटनास्थळापासून १० किमी अंतरावर सोनम हिला तीन आरोपी आकाश विशाल आणि आनंदसोबत बोलताना सीसीटीव्ही पाहिले. तसेच घटनास्थळावरून आकाशचं रक्ताने माखलेलं जॅकेट, सोनमचा रेनकोट आणि आणि राजाच्या मोबाईलचे अवशेष सापडले होते. तपासामध्ये सोनम हिने आपलं जॅकेट राजाला दिलं होतं, असं उघड झालं आहे. त्यावरही रक्ताचे डाग पडले होते. तेही घटनास्थळावर फेकण्यात आलं होतं.
या प्रकरणातील एक आरोपी आनंद याला जेव्हा पोलिसांनी अटक केली तेव्हा त्याने राजाची हत्या करताना घातलेले कपडेच परिधान केलेले होते. तर राजावर पहिला वार विशालने केला होता. तसेच त्यासाठी त्यांनी गुवाहाटी रेल्वे स्टेशनजवळून हत्यार खरेदी केलं होतं.