अमेठी : राफेल डील प्रकरणावरुन देशातील राजकारण ढवळून निघाले आहे. याप्रकरणी काँग्रेसचे अध्यक्ष राहुल गांधी यांनी पंतप्रधान नरेंद्र मोदींना लक्ष केले आहे. गेल्या काही दिवसांपासून राहुल गांधी यांच्यासह सर्वच विरोधी पक्षांकडून सुद्धा मोदी सरकारवर राफेल डील प्रकरणावरुन टीका करण्यात येत आहे.
पंतप्रधान नरेंद्र मोदींनी Hindustan Aeronautics Limited (HAL)कडून करार काढून घेतले आणि अनिल अंबानींना दिले. अनिल अंबानी यांनी आयुष्यात कधीच विमान बनविले नाही. देशासाठी शहीद होणाऱ्या जवानांच्या खिशातून नरेंद्र मोदींनी पैशांची चोरी करुन अनिल अंबानींना दिले, असा आरोप राहुल गांधी यांनी केला आहे.
याचबरोबर, पंतप्रधान नरेंद्र मोदी मोठी भाषणे करतात. मात्र, राफेल डील आणि अनिल अंबानी याबद्दल एक शब्द सुद्धा काढत नाहीत. कारण, चौकीदारानेच अनिल अंबानींच्यामार्फत चोरी केली आहे, अशी टीका करत याप्रकरणी संयुक्त संसदीय समितीची नेमणूक करा, म्हणजे सत्य काय आहे, ते बाहेर येईल, असे राहुल गांधी म्हणाले.