पहलगाम दहशतवादी हल्ल्यात मृत्यूमुखी पडलेले नौदलाचे अधिकारी मेजर विनय नरवाल यांच्या पत्नीचा एआयद्वारे अश्लील व्हिडीओ बनवून तो युट्यूबवर टाकणाऱ्या नराधम पिता-पुत्राला अटक करण्यात आली आहे. हरियाणा पोलिसांनी ही कारवाई केली आहे.
बिहारच्या गोपालगंज पोलिसांच्या मदतीने धेबवलिया गावातून दोघांना अटक करण्यात आली आहे. मोहिबुल हक आणि त्याचा मुलगा गुलाब जिलानी या दोघांना अटक करण्यात आली आहे. एसएस रियल पॉइंट' नावाच्या यूट्यूब चॅनलवर नरवाल यांच्या पत्नीचा एआय व्हिडीओ अपलोड करण्यात आला होता. चेहरा मॉर्फ करून हा व्हिडीओ बनविण्यात आला होता. हरियाणाच्या गुरुग्राम सायबर पोलिस स्टेशनमध्ये याविरोधात गुन्हा दाखल करण्यात आला होता.
दोन्ही आरोपींना गोपाळगंज येथून अटक करून न्यायालयात हजर करण्यात आले. तपासात या दोघांनी यापूर्वीही असेच व्हिडीओ बनवून ते युट्यूबवर अपलोड केल्याचे आढळले आहे. या प्रकरणात आणखी लोकांचा सहभाग असण्याची शक्यता पोलिसांनी वर्तविली आहे. त्या दिशेने तपास सुरु असल्याचे पोलिसांनी सांगितले.
न्यूझीलंडच्या एका महिला खासदाराने आपलाच एआय न्यूड फोटो संसदेत दाखवून या गुन्हेगारीविरोधात कठोर पाऊले उचलण्याची गरज असल्याचे म्हटले होते. केवळ एकाच देशात नाही तर जगभरात अशा एआय कृत्यांवर आळा घालण्याची गरज व्यक्त होत आहे. पहलगाम हल्ल्यातील पीडितेचा असा व्हिडीओ काढून तो अपलोड करणे म्हणजे नीचपणाचा कळस असल्याचे सोशल मीडियावर व्यक्त केले जात आहे. अशा विकृत लोकांची विकृती ठेचण्याचीही मागणी केली जात आहे.
पहलगाम हल्ल्याच्या सात दिवसांपूर्वीच विनय नरवाल यांचे लग्न झाले होते. हे जोडपे हनिमूनसाठी काश्मीरला गेले होते. दहशतवाद्यांनी त्यांची गोळी झाडून हत्या केली होती, तसेच पत्नीला जाऊन मोदांना सांग असेही म्हटले होते. एकूण २६ जणांचा या हल्ल्यात मृत्यू झाला होता. यामुळेच भारताने पाकिस्तानवर स्ट्राईक करण्यासाठी ऑपरेशन सिंदूर राबविले होते.