आई-वडिलांच्या काळजाचा तुकडा गेला; अडीच वर्षांची लेक उघड्या चेंबरमध्ये पडली, सापडला मृतदेह

एका अडीच वर्षांच्या चिमुकलीचा चेंबरमध्ये पडून मृत्यू झाला.

पाटण्यातील नौबतपूर पोलीस ठाण्याच्या हद्दीत नोएडा येथील घटनेची पुनरावृत्ती झाली आहे. हे संपूर्ण प्रकरण सरासत गावातील आहे. गुरुवारी एका अडीच वर्षांच्या चिमुकलीचा चेंबरमध्ये पडून मृत्यू झाला. ही मुलगी अंगणवाडी केंद्रातून घरी परतत असताना वाटेत असलेल्या एका उघड्या चेंबरमध्ये पडली. रात्री उशिरा तिला चेंबरमधून बाहेर काढण्यात आलं परंतु तोपर्यंत खूप उशीर झाला होता.

कुटुंबीयांनी दिलेल्या माहितीनुसार, मुलगी सकाळी १० च्या सुमारास घरापासून १०० मीटर अंतरावर असलेल्या अंगणवाडी केंद्रात गेली होती. सुटल्यानंतरही जेव्हा ती घरी परतली नाही, तेव्हा कुटुंबीय अंगणवाडीत चौकशी करायला गेले. तिथे समजलं की मुलगी अंगणवाडी सुटल्यावर कधीच निघून गेली आहे. त्यानंतर कुटुंबीयांनी तातडीने शोध सुरू केला, मात्र ती कुठेच सापडली नाही.

मुलगी न सापडल्यामुळे तिचं अपहरण झालं असावं अशी शंका कुटुंबीयांना आली. त्यांनी तातडीने पोलिसांना याची माहिती दिली. याच दरम्यान गावकऱ्यांचं लक्ष रस्त्यावरील एका उघड्या चेंबरकडे गेलं. संशय आल्याने एका काठीच्या साहाय्याने तिथा शोध घेतला असता, मुलीची बॅग दिसली. त्यानंतर गावकऱ्यांच्या मदतीने मोटर लावून नाल्यातील पाणी उपसण्यास सुरुवात झाली. पाणी कमी झाल्यावर मुलगी चिखलात अडकलेली आढळली.

मुलीला तातडीने डॉक्टरांकडे नेण्यात आलं, मात्र तिचा मृत्यू झाला होता. घटनेची माहिती मिळताच पोलिसांनी घटनास्थळी धाव घेतली. नौबतपूर पोलीस ठाण्याचे प्रभारी मंजीत ठाकूर यांनी सांगितलें की, सर्व बाजूंनी या प्रकरणाचा तपास सुरू आहे. भविष्यात अशा घटना घडू नयेत यासाठी उघडे चेंबर झाकण्याची आणि सुरक्षा व्यवस्था कडक करण्याची मागणी गावकऱ्यांनी केली आहे.

संतप्त नातेवाईकांनी अंगणवाडी सेविकेवर निष्काळजीपणाचा आरोप केला आहे. सेविकेने मुलीला घरापर्यंत सोडलं असतं, तर हा अपघात टळला असता असं त्याचं म्हणणं आहे. रिया कुमारी असं मृत्यू झालेल्या मुलीचं नाव असून ती तिच्या आई-वडिलांची एकुलती एक मुलगी होती. तिचे वडील राकेश कुमार हे मजुरीचं काम करतात.