नितीश आणि लालू शेजारी-शेजारी

निंदकाचे घर असावे शेजारी ही प्रचलित म्हण सध्या नितीश व लालू यांच्याकरिता शब्दश: सार्थ ठरणार असे दिसते आहे.

पाटणा : निंदकाचे घर असावे शेजारी ही प्रचलित म्हण सध्या नितीश व लालू यांच्याकरिता शब्दश: सार्थ ठरणार असे दिसते आहे. लोकसभा निवडणुकीत झालेल्या दारुण पराभवाची नैतिक जबाबदारी स्वीकारून बिहारच्या मुख्यमंत्रिपदाचा राजीनामा दिल्यानंतर नितीशकुमार आपले कट्टर विरोधक लालू यांच्या शेजारी राहावयास जाणार असल्याचे वृत्त आहे. १ अणे मार्गावरील मुख्यमंत्री निवासस्थानात नऊ वर्षे राहिल्यानंतर ते सोडून नितीश कुमारांना ७ सर्क्युलर रोडवरील बंगल्यात स्थानांतरित व्हावे लागणार आहे. या बंगल्याच्या बाजूच्याच बंगल्यात राजदचे सुप्रीमो लालूप्रसाद यादव हे आपल्या पत्नीसह राहत आहेत. माजी मुख्यमंत्री या नात्याने इमारत बांधकाम विभागाने नितीशकुमारांना हा बंगला दिला असून त्यात सध्या राज्याचे मुख्य सचिव अशोक कुमार सिन्हा हे राहत आहेत. ते जूनमध्ये सेवानिवृत्त होत असून त्यांच्यानंतर नितीशकुमार तेथे राहावयास येतील. तोपर्यंत त्यांना २ स्टँडरोडवरील एक बंगला देण्यात आला आहे. लवकरच हे दोन्ही बिहारी बाबू शेजारी-शेजारी राहावयास येणार ही एक मोठी बातमी आहे. कारण जनता दलाच्या विभाजनानंतर नितीश व लालू हे परस्परांचे कट्टर विरोधक बनले होते. मात्र त्यांच्या अशा अपरिहार्य आजूबाजूला राहण्यामुळे हा नवा शेजारधर्म ते कसे सांभाळतात हे आता पहायचे. (वृत्तसंस्था)