कोलकाता - पश्चिम बंगालमधील दुसऱ्या टप्प्यातील मतदानादरम्यान धक्कादायक घटना उघडकीस आली आहे. दुसऱ्या टप्प्यातील मतदान सुरू असताना राज्यातील नादिया जिल्ह्यातील एक निवडणूक अधिकारीच बेपत्ता झाल्याची माहिती समोर आली आहे. दरम्यान, आज याप्रकरणी निवडणूक आयोगाकडून पोलिसात तक्रार दाखल करण्यात आली आहे.
मिळालेल्या माहितीनुसार नादिया जिल्ह्यातील निवडणूक अधिकारी अर्णब रॉय हे निवडणुकीला सुरुवात होण्यापूर्वीपासून बेपत्ता आहेत. काल दुपारपासूनच त्यांचा कुठलाही ठावठिकाणा लागलेला नाही. तसेच त्यांचा मोबाईलही बंद असल्याचे उघड झाले आहे. अर्णब रॉय यांच्या संदर्भातील अधिक माहिती मिळवण्यासाठी पोलिसांनी त्यांच्या वाहनचालकाचीही चौकसी केली आहे.