पश्चिम बंगालच्या मुख्यमंत्री ममता बॅनर्जी या हेलिकॉप्टरमध्येच पाय अडकून पडल्या आहेत. गेल्या महिन्यात देखील त्या बाथरुममध्ये पडल्याने त्यांच्या डोक्याला इजा झाली होती. आता हेलिकॉप्टरमध्ये चढल्यानंतर अडखळून पडल्या आहेत.
याचा व्हिडीओ व्हायरल होत आहे. पश्चिम बर्धमानच्या दुर्गापूरमध्ये हा प्रकार घडला आहे. त्या प्रचार करण्यासाठी गेल्या होत्या. प्रचार संपवून त्या कारने हेलिपॅडकडे आल्या. शिडीवरून हेलिकॉप्टरमध्ये चढताना हेलिकॉप्टरच्या गेटवर त्यांचा पाय घसरल्याचे सांगिण्यात येत आहे. यामुळे त्यांचा तोल जाऊन त्या हेलिकॉप्टरमध्येच पडल्याचे व्हिडीओत दिसत आहे.
पडल्याचे दिसताच सुरक्षा रक्षकांनी त्यांना सावरले. ममता यांना हलका मार लागला आहे. दुर्गापूरहून त्या आसनसोलला रवाना झाल्या आहेत. गेल्या महिन्यात १४ मार्चला त्या त्यांच्या निवासस्थानी पडल्या होत्या. जानेवारीमध्येही त्यांच्या डोक्याला मार लागला होता. बर्धमानहून कोलकात्याला येत असताना मुसळधार पावसात त्यांच्या कार चालकाने अचानक ब्रेक लावला होता. यामुळे ममतांचे डोके आदळले होते.
२०२३ च्या जूनमध्येही ममता या विदेश दौऱ्यावर असताना त्यांच्या गुढघ्याला मार लागला होता. त्यापूर्वी २०२३ च्या सुरुवातीला हेलिक़ॉप्टरमधून उतरताना त्या जखमी झाल्या होत्या.