नवी दिल्ली - केंद्रीय मंत्री मेनका गांधी यांनी बुधवारी बहुजन समाज पार्टीच्या नेत्या यांच्यावर जोरदार हल्ला चढविला. मायावती या करोडो रुपयांना लोकसभा उमेदवारीचे तिकीट विकतात असा गंभीर आरोप मेनका गांधी यांनी केला. सुलतानपूर लोकसभा मतदारसंघातून मेनका गांधी भाजपाच्या उमेदवार आहेत. बुधवारी सुलतानपूर येथे आयोजित केलेल्या सभेत बोलताना मेनका गांधी यांनी हा आरोप केला.
यावेळी बोलताना मेनका गांधी म्हणाल्या की, बसपा नेत्या मायावती उमेदवारीचे तिकीट विकतात हे सर्वांनाच माहीत आहे. त्यांच्या पक्षाने नेते अभिमानाने हे सांगतात. मायावती यांचे 77 घरं आहेत, मायावती यांच्या पक्षाचे नेतेच सांगतात, आमच्या नेत्या मायावती हिरे नाही तर पैसे घेते. 15 करोड रुपयांना उमेदवारीचे तिकीट दिले जाते असा आरोप मेनका गांधी यांनी केला.
बसपामध्ये कोणालाही तिकीट मोफत दिले जात नाही. 15 करोड रुपये देऊन उमेदवारी घ्यावी लागते मग सपा-बसपा आघाडीचे उमेदवार चंद्रभद्र सिंह उर्फ सोनू यांच्याकडे हे पैसे आले कुठून? असा सवाल मेनका गांधी यांनी उपस्थितांना केला. तसेच हे 15 करोड रुपये तुमच्या खिशातून काढून दिल्याची टीकाही मेनका गांधी यांनी विरोधी उमेदवार चंद्रभद्र सिंह यांच्यावर केली.
उत्तर प्रदेशात लोकसभा मतदारसंघाच्या 80 जागा आहेत. मागील निवडणुकीत भाजपाला 70 हून अधिक जागांवर विजय मिळाला होता. मात्र यंदाची निवडणुकीत समाजवादी पार्टी आणि बहुजन समाज पार्टी या कट्टर विरोधकांनी एकत्र येत भारतीय जनता पार्टीला आव्हान दिले आहे. त्यामुळे उत्तर प्रदेशात जास्तीत जास्त जागा निवडून आणण्यासाठी भाजपा प्रयत्न करत आहे.