नवी दिल्ली - उत्तर प्रदेशमधील अमेठीत भाजपच्या कार्यकर्त्यांची हत्येची घटना ताजी असतानाच आता, पुन्हा बंगालमध्ये एका भाजप कार्यकर्त्यांची हत्या करण्यात आली असल्याची धक्कादायक माहिती समोर आली आहे. ही घटना रविवारी २४ परगना जिल्ह्यात घडली आहे. ह्या घटनेमुळे खळबळ उडाली असून, परिसरात सुरक्षा दलाचे जवान तैनात करण्यात आले आहेत.
अमेठीमधील बरौलिया गावातील माजी सरपंच सुरेंद्र सिंह यांची गोळ्या झाडून हत्या करण्यात आल्याची घटना घडून तीन दिवस उलटली नसून, आता पुन्हा पश्चीम बंगालमध्ये भाजपचे कार्यकर्ते चंदन शॉ यांच्यावर अज्ञातांकडून रविवारी रात्री गोळ्या झाडण्यात आल्या आहे. त्यामुळे, लोकसभा निवडणुकीच्या निकालानंतर भाजप कार्यर्त्यांच्या हत्येचे सत्र सुरू असल्याचे दिसून येत आहे.
या पूर्वी नादियामधील चकदहा येथे शांतू घोष या भाजप कार्यकर्त्याची हत्या झाली होती. यानंतर अमेठीमधील माजी सरपंच सुरेंद्र सिंह यांची हत्या करण्यात आली होती. तर रविवारी रात्री पश्चिम बंगालमधील आणखी एका भाजप कार्यकर्त्याची हत्या झाली असुन देशभरात अशाप्रकारे झालेली ही तिसरी हत्या आहे. या प्रकरणात पोलिसांनी २५ वर्षीय भारत बिश्वास उर्फ पोचन याला शनिवारी ताब्यात घेतले आहे.