नवी दिल्ली, दि. 23 - तीन राज्यातील विधानसभेच्या चार जागांसाठी आज पोटनिवडणूक होत असून, दिल्लीत मुख्यंत्री अरविंद केजरीवाल तर, गोव्यामध्ये मुख्यमंत्री मनोहर पर्रिकर यांची प्रतिष्ठा पणाला लागली आहे. नवी दिल्लीतील बावाना, आंध्रप्रदेशातील नानद्याल तर, गोव्यात पणजी आणि वालपोई या दोन जागांसाठी मतदान होत आहे. नवी दिल्लीतील बावाना विधानसभा मतदारसंघातील आपचे आमदार वेद प्रकाश यांनी मार्च महिन्यात भाजपामध्ये प्रवेश केल्यामुळे ही जागा रिक्त झाली होती. त्यामुळे इथे निवडणूक होत आहे.
मनोहर पर्रिकर यांनी गोव्याच्या मुख्यमंत्रीपदाची धुरा संभाळल्यानंतर त्यांना सहा महिन्यांच्या आत विधानसभेवर निवडून जाणे आवश्यक आहे. पर्रिकरांसाठी पणजीचे आमदार सिद्धार्थ कुंकळयेकर यांनी आपली आमदारकी सोडली. पर्रीकरांसमोर काँग्रेसच्या गिरीश चोडणकर यांचे आव्हान आहे. गोव्याचे माजी मुख्यमंत्री प्रतापसिंग राणे यांचे पुत्र विश्वजीत राणे यांनी काँग्रेसला रामराम करून भाजपामध्ये प्रवेश केला. त्यामुळे वालपोईमध्ये पोटनिवडणूक होत आहे. त्यांच्यासमोर रॉय रवी नाईक यांचे आव्हान आहे. मार्च महिन्यात गोव्यात मनोहर पर्रिकर यांच्या नेतृत्वाखाली भाजपाने विश्वासदर्शक ठराव जिंकल्यानंतर विश्वजित राणे यांनी भाजपामध्ये प्रवेश केला.
आंध्रप्रदेशच्या नानद्यालमध्ये आमदार भुमा नागी रेड्डी यांच्या निधनामुळे विधानसभेची पोटनिवडणूक होत आहे. दिल्लीतील पोटनिवडणूकीत अरविंद केजरीवाल यांच्या नेतृत्वाची कसोटी लागली आहे. कारण काही महिन्यांपूर्वी झालेल्या दिल्ली महापालिका निवडणुकीत आम आदमी पक्षाचा पार धुव्वा उडाला होता.
पोटनिवडणुकीतून ‘आप’ची माघार गोव्याची राजधानी पणजी तसेच वाळपई विधानसभा मतदारसंघाची पोटनिवडणूक न लढविण्याचा निर्णय आम आदमी पक्षाने जाहीर केलं. या दोन्ही पोटनिवडणुका लढविणार असल्याचे पक्षाने यापूर्वी म्हटलेलं होतं. आम आदमी पक्षाने या वर्षाच्या सुरुवातीला झालेल्या विधानसभा निवडणुका पूर्ण ताकदीने लढवल्या होत्या; पण त्यांचा एकही उमेदवार टिकाव धरू शकला नव्हता. निवडणुकीनंतर पक्षाचे काम थंडावले आहे. पर्रीकर यांच्या विरोधातील मते विभागली जाऊ नयेत, मतदारांचा गोंधळ उडू नये तसेच पर्रीकर यांची कोंडी व्हावी, असं आपने म्हटलं होतं. जाहीर बोलण्याची ही भाषा असली तरी संघटनात्मक ताकद कमी असल्याने आपने निवडणुका लढविल्या असत्या तरी चित्र फारसे बदलले नसते, असे राजकीय जाणकारांना वाटते.
पणजी मतदारसंघातून भाजपचे मुख्यमंत्री मनोहर पर्रीकर यांच्याविरोधात काँग्रेसतर्फे राष्ट्रीय सरचिटणीस गिरीश चोडणकर लढत देतील. भाषा माध्यमाच्या मुद्द्यावरून भाजपशी पंगा घेतलेल्या गोवा सुरक्षा मंच पक्षाने पक्षाचे अध्यक्ष आनंद शिरोडकर यांनाच निवडणूक रिंगणात उतरविले आहे. पर्रिकर यांना बिनविरोध निवडून येण्याची संधी न देणे आणि निवडणुकीच्या माध्यमातून पर्रिकर यांच्यावर भाषा माध्यमाचा प्रश्न सोडविण्यासाठी दबाव टाकण्याची खेळी गोवा सुरक्षा मंच खेळण्याची चिन्हे दिसत आहेत. शिवसेना त्यांना साथ देण्याची शक्यता आहे.