Haryana Assembly Elections 2024 : हरियाणात पुन्हा सत्तेत येण्यासाठी काँग्रेस सर्वतोपरी प्रयत्न करत आहे. तसेच, हरियाणातील विधानसभा निवडणुकीच्या पार्श्वभूमीवर काँग्रेसमध्ये अनेक ज्येष्ठ नेते मुख्यमंत्रीपदासाठी दावा करत आहेत. दरम्यान, काँग्रेसमध्ये दलित समाजातून मुख्यमंत्री होऊ शकतो. दलित समाजाचीही ही मागणी आहे. काळानुरूप बदलही होत असतात. राहुल गांधींनाही दलित समाजाला पुढे आणायचे आहे आणि मुख्यमंत्री कोणाला करायचे हा निर्णय हायकमांड घेईल, असे काँग्रेसच्या खासदार कुमारी सैलजा यांनी सांगितले आहे.
सिरसाच्या खासदार कुमारी सैलजा यांनी शुक्रवारी (२७ सप्टेंबर) कालनवली येथे निवडणूक प्रचार केला. काँग्रेसचे उमेदवार शिशपाल केहरवाला यांच्या समर्थनार्थ कुमारी सैलजा यांची जाहीर सभा झाली. यावेळी कुमारी सैलजा यांनी प्रसारमाध्यमांशी संवाद साधला. त्या म्हणाल्या की, हरियाणात भाजपचा सफाया झाला आहे. काँग्रेस बहुमताने सरकार स्थापन करणार आहे. माझ्या रक्तात काँग्रेस आहे, मी मरेपर्यंत काँग्रेसमध्येच राहणार आहे. तसेच, भाजप असे डावपेच अवलंबते. जनता भाजपच्या डावपेचांना कंटाळली आहे.
याचबरोबर, १० वर्षांपासून हरियाणा राज्यात भाजपचे चांगले सरकार नाही, तर वाईट सरकार आहे. सरकारी पोर्टलमुळे लोकांना अनेक समस्यांना सामोरे जावे लागले. केंद्र आणि राज्यात भाजपचे डबल इंजिन सरकार अपयशी ठरले आहे. भाजपला एकमेव पर्याय फक्त काँग्रेस हाच आहे. २०१९ मध्ये भाजपला बहुमत मिळाले नाही. जेजेपीच्या १० आमदारांनी भाजपच्या विरोधात मते मागितल्याने भाजप सत्तेवर आले. आता हरियाणात भाजप आणि जेजेपीच्या विरोधात मतदान होणार आहे, असे म्हणत कुमारी सैलजा यांनी भाजपवर जोरदार हल्लाबोल केला.
दरम्यान, हरियाणातील विधानसभा निवडणुकीची तारीख जशी जवळ येईल, तसं राजकीय वातावरण तापले आहे. या निवडणुकीच्या पार्श्वभूमीवर काँग्रेसमध्ये अनेक ज्येष्ठ नेते मुख्यमंत्रीपदासाठी दावा करत आहेत. तसेच, काँग्रेसमध्ये अंतर्गत कलह असल्याचे दिसून आले. तिकीट वाटपावरून काँग्रेसमध्ये खडाजंगी झाल्याची चर्चा सुद्धा राजकीय वर्तुळात होती. यातच भूपेंद्र हुड्डा, कुमारी सैलजा आणि रणदीप सुरजेवाला यांच्या नावाची मुख्यमंत्रीपदासाठी चर्चा सुरु आहे, तर दुसरीकडे भूपेंद्र हुड्डा यांचा मुलगा दीपेंद्र हुड्डा यांच्या नावाचीही मुख्यमंत्रीपदासाठी चर्चा आहे.