Sharmista Panoli Case: ऑपरेशन सिंदूरवरुन सोशल मीडिया पोस्टद्वारे धार्मिक भावना दुखावल्याच्या आरोपाखाली अटक करण्यात आलेल्या इंस्टाग्राम इन्फ्लुएंसर शर्मिष्ठा पनोलीला कोलकाता कोर्टाने जामीन देण्यास नकार दिला आहे. कोर्टाने कायद्याची विद्यार्थिनी असलेल्या २२ वर्षीय शर्मिष्ठा पनोलीचा जामीन नाकारत १४ दिवसांची न्यायालयीन कोठडी सुनावली होती. ऑपरेशन सिंदूरनंतर बॉलिवूड कलाकारांनी बाळगलेल्या मौनावर तिने एक व्हिडिओ पोस्ट केला होता. त्यानंतर हरियाणाच्या गुरुग्राम येथून कोलकाता पोलिसांनी तिला अटक केली होती. आता पनोलीला जामीन नाकारणाऱ्या न्यायमूर्तींना जीवे मारण्याच्या धमक्या येत असल्याचा प्रकार समोर आला आहे.
वादग्रस्त व्हिडीओ प्रकरणात शर्मिष्ठा पनोलीला जामीन देण्यास नकार दिल्यानंतर कोलकाता हायकोर्टाचे न्यायाधीश पार्थ सारथी चॅटर्जी यांना जीवे मारण्याच्या धमक्या येत आहेत. ३ जून रोजी पनोलीचा जामीन अर्ज फेटाळण्यात आल्यापासून, अनेक निनावी आणि बनावट अकाउंटवरुन न्यायाधीशांविरुद्ध अपमानास्पद टीका केली जात असून त्यांना जीवे मारण्याच्या धमक्या पोस्ट केल्या जात आहेत.
पार्थ सारथी चॅटर्जीला मारहाणीची गरज आहे. त्यासाठी हिंदुस्थानात अज्ञात बंदुकधारींची गरज आहे, न्यायमूर्ती चॅटर्जींना मारून टाका, जर कोणाला यांचा (न्यायाधीश चॅटर्जी) पत्ता किंवा मोबाईल नंबर माहित असेल तर सांगा, हे न्यायमूर्ती कधी तुम्हाला सार्वजनिक ठिकाणी भेटले तर त्यांना योग्य वागणूक द्या, अमित शहाजी, तुम्ही त्यांना काही अनोळखी लोकांकडून बेल्ट ट्रीटमेंट मिळवून देऊ शकता का? अशा धमक्या न्यायमूर्ती पार्थ सारथी चॅटर्जी यांना फेक अकाऊंटवरुन मिळत आहेत.
पुण्यातील सिम्बायोसिस लॉ स्कूलची विद्यार्थिनी असलेल्या शर्मिष्ठा पनोलीला ३० मे रोजी गुरुग्राममध्ये अटक करण्यात आली होती. एफआयआरमध्ये तिच्यावर अदखलपात्र गुन्हा दाखल करण्यात आला होता. ऑपरेशन सिंदूरनंतर बॉलिवूड कलाकारांनी बाळगलेल्या मौनावर तिने एक व्हिडिओ पोस्ट केला होता. व्हायरल व्हिडिओबद्दल टीका झाल्यानंतर, पनोलीने तो व्हिडिओ काढून टाकला आणि एक्सवरुन माफी मागितली होती. मात्र त्यानंतरही तिला अटक करण्यात आली. कोर्टाने पनोलीचा जामीन नाकारताना अभिव्यक्ती स्वातंत्र्य धार्मिक भावना दुखावण्याची परवानगी देत नाही, अशी टिप्पणी केली होती.