नवी दिल्ली: पाकिस्तानचे लष्कर आणि दहशतवादी यांच्याकडून जम्मू- काश्मीरमध्ये सुरु असलेल्या अमानुष कृत्यांना जशास तसे उत्तर देण्याची हीच वेळ आहे, असे लष्करप्रमुख जनरल बिपिन रावत यांनी शनिवारी येथे सांगितले.
जम्मू-काश्मीरमध्ये सुरु असलेल्या घटनांचा संदर्भ देत पत्रकारांशी बोलताना जनरल बिपिन रावत म्हणाले की, दहशतवाद्यांना आणि पाकिस्तानला त्यांच्याच भाषेत उत्तर देण्याची वेळ आली आहे. त्यांच्यासारखा अमानुषपणा न करताही त्यांनाही आपल्यासारखे क्लेष जाणवायला हवेत.
तसेच, पाकिस्तानकडून दहशतवादास खतपाणी घालणे सुरु असेपर्यंत त्या देशाशी बोलणी केली जाऊ शकत नाहीत, या सरकारी भूमिकेचा लष्करप्रमुखांनी पुनरुच्चार केला.