Iran Israel Conflict Updates: इराणमध्ये हमासचा नेता इस्माईल हानियाच्या हत्येनंतर मध्य पूर्वेत तणाव शिगेला पोहोचला आहे. इराणने इस्माईल हानियाच्या मृत्यूचा बदला इस्रायलकडून घेण्याची घोषणा केली होती. त्यामुळं मध्य पूर्वेतील सतत तनाव वाढताना दिसून येत आहे. यादरम्यान, इस्रायली सैन्यानं (आयडीएफ) हिजबुल्लाच्या अनेक ठिकाणांवर हल्ले केले आहेत.
रात्रभर हल्ले करून दक्षिण लेबनॉनमधील हिजबुल्लाहची अनेक ठिकाणं नष्ट करण्यात आल्याची माहिती आयडीएफनं दिली आहे. इराण आणि लेबनॉनच्या धमक्यांच्या दरम्यान हिजबुल्लाच्या ठिकाणांवर इस्रायलीनं हल्ला केला आहे. ३१ जुलै रोजी राजधानी तेहरानमध्ये हमासचा प्रमुख इस्माईल हानिया यांच्या हत्येमुळे संतप्त झालेल्या इराणनं इस्रायलला धडा शिकवण्याची धमकी दिली होती. त्यामुळं आता इराण कधीही युद्ध करु शकतं, असं म्हटलं जात होतं.
अमेरिकेचे परराष्ट्र मंत्री अँटनी ब्लिंकन यांनीही इराण आणि हिजबुल्लाहच्या या धमक्या पाहता हे देश इस्रायलवर कधीही हल्ला करू शकतात, असं म्हटले होतं. मात्र इराण आणि लेबनॉनच्या धमक्यांकडे दुर्लक्ष करून इस्रायलनं हिजबुल्लाचे अनेक तळ उद्ध्वस्त केले आहेत. या धमक्या लक्षात घेऊन इस्रायलचे पंतप्रधान बेंजामिन नेतन्याहू यांनी म्हटलं होतं की, इराण आणि त्यांचे समर्थक आपल्याला दहशतवादाच्या तावडीत अडकवू इच्छितात. त्यांच्या विरोधात प्रत्येक आघाडीवर आणि प्रत्येक क्षेत्रात, जवळ किंवा दूरवर उभे राहण्याचा आमचा निर्धार आहे.
दरम्यान, गेल्या आठवड्यात इराणची राजधानी तेहरानमध्ये हमास प्रमुख इस्माईल हानिया यांच्या हत्येनंतर तणाव वाढला आहे. या घटनेच्या एक दिवस आधी लेबनॉनची राजधानी बेरूतमध्ये हिजबुल्लाचा सर्वोच्च लष्करी कमांडर फऊद शुकरची हत्या करण्यात आली होती. हानिया हा गाझामधील हमासचा प्रमुख होता आणि इराणच्या नव्या राष्ट्राध्यक्षांच्या शपथविधी समारंभात सहभागी होण्यासाठी तो तेहरानला गेला होता.
दुसरीकडे, हिजबुल्लाहनेही इस्रायलला लक्ष्य करण्यास सुरुवात केली. हिजबुल्लाहने गेल्या शनिवारी इस्रायलवर जवळपास ५० रॉकेट डागले होते. मात्र, इस्रायलच्या आयर्न डोमने हा हल्ला हाणून पाडला. इराण आणि हिजबुल्लाहने सूड उगवण्याच्या घोषणेमुळे मध्यपूर्वेत मोठ्या प्रमाणावर युद्ध भडकण्याची शक्यता बळावली आहे. दरम्यान, सध्याच्या परिस्थितीवर चर्चा करण्यासाठी अमेरिकेचे अध्यक्ष ज्यो बायडन यांनी तातडीची बैठक बोलावली होती. पुढील घटना टाळण्यासाठी पेंटागॉनने या भागात अतिरिक्त सैन्य दल तैनात करण्याची घोषणा केली आहे.