नवी दिल्ली - पंजाबची कन्या हरनाज संधू (Harnaaz Sandhu)ने मिस युनिव्हर्स (Miss Universe)चा खिताब जिंकून देशाचे नाव उंचावले आहे. 13 डिसेंबर 2021 हा ऐतिहासिक दिवस ठरला जेव्हा 21 वर्षांनी मिस युनिव्हर्सचा खिताब पुन्हा एकदा भारतात परत आला. हरनाज सिंधूच्या आधी सुष्मिता सेन (1994) आणि लारा दत्ता (2000) यांनी हा खिताब जिंकला होता. त्यामुळे, हरनाजचे देशभरातून कौतुक आणि अभिनंदन होत आहे. हरनाजने मिस युनिव्हर्स खिताब जिंकल्यानंतर आता माजी केंद्रीयमंत्री खासदार शशी थरुर यांच्यासमवेतच तिचा फोटो व्हायरल झाला आहे.
हरनाज संधूने मिस युनिव्हर्सचा खिताब जिंकल्यापासून सोशल मीडियावर तिचा बोलबाला आहे. त्यातच, शशी थरुर यांनी तिच्यासोबत सेल्फी घेत एक फोटो शेअर केला आहे. थरुर यांनी ट्विटरवरुन हरनाजचं अभिनंदनही केलंय. थरुर आणि हरनाज यांचे हे फोटो सोशल मीडियावर चांगलेच व्हायरल झाले आहेत. नेटीझन्सने या फोटोवरुन थरुर यांना ट्रोल केलंय, तर काहींनी हटके सल्लाही दिला आहे.
थरुर यांनी हरनजाचे मायदेशी स्वागत असल्याचं म्हटलं. तसेच, हरनाजचे स्वागत करताना देशाला अभिमान वाटतो. ती मिस युनिव्हर्सच्या मंचावर जेवढी आकर्षक दिसत होती, तितकीच आकर्षक प्रत्यक्ष भेटल्यावरही दिसून आली, असे थरुर यांनी ट्विट करुन म्हटले आहे. त्यानंतर, अनेकांनी थरुर यांना ट्रोल केलंय. मैथमैटिसिअन नीना गुप्ता यांनी रामानुजन अवॉर्ड जिंकला आहे, त्यांना आपण शुभेच्छा दिल्या का?, असा सवाल एका युजरने केला. तर, तरुण जोशी या युजरसने थरुर यांना आपण राजकारणातील रणबीर कपूर असल्याचे म्हटलंय.
हरनाज कोण आहे?
हरनाज ही चंदिगडची रहिवासी आहे. तिचा जन्म शीख कुटुंबात झाला. हरनाजला फिटनेस आणि योगाची आवड आहे. हरनाजने अनेक सौंदर्य स्पर्धा जिंकल्या आहेत. 2017 मध्ये तिने मिस चंदीगडचा किताब जिंकला होता. मिस युनिव्हर्सचा किताब जिंकण्यापूर्वीच ती चित्रपटांकडे वळली होती. ती 'बाई जी कुटंगे' आणि 'यारा दियां पू बरन' या दोन पंजाबी सिनेमांमध्ये दिसणार आहे. हे दोन्ही चित्रपट पुढच्या वर्षी प्रदर्शित होणार आहेत
लारा दत्तानेही दिल्या शुभेच्छा
लाराने लिहिले- माझी प्रिय हरनाज, तू केवळ या विजयाच्याच नाही तर आणखी बऱ्याच गोष्टींच्या लायक आहे. तुझा स्वतःवर अतूट विश्वास आहे. यासाठीच तुझा जन्म झाला हे तुम्हाला माहीत आहे. ज्या वर्षी तुझा जन्म झाला त्या वर्षी मी मिस युनिव्हर्स बनले. आम्ही तुझी खूप वाट पाहिली की तू येशील आणि भारतासाठी पुन्हा एकदा मुकुट घेऊन येशील. कदाचित हे नशीबात होते. लारा दत्ताने तिच्या पोस्टमध्ये हरनाज संधूला उज्ज्वल भविष्यासाठी आणि यशासाठी शुभेच्छा दिल्या.