Bikaner Express Derailed: पश्चिम बंगालच्या जलपाईगुडी येथील मैनगुडी परिसरात बीकानेर एक्स्प्रेसचे डबे रेल्वे रुळावरुन घसरले आहेत. यात अनेक प्रवासी जखमी झाल्याची माहिती समोर येत आहे. रेल्वेचे एकूण चार डबे रेल्वे रुळावरुन घसरल्याची प्राथमिक माहिती समोर आली आहे. बीकानेर एक्स्प्रेस पाटणाहून आसामच्या गुवाहटी येथे जात होती. याच दरम्यान मैनागुडी येथे रेल्वे रुळावरुन घसरली आहे. घटनेची माहिती मिळताच रेल्वेसह प्रशासनाचे वरीष्ठ अधिकारी घटनास्थळावर पोहोचले आहे.
अपघातात जखमी झालेल्या प्रवाशांना रेल्वे डब्यांतून बाहेर काढून रुग्णालयात दाखल केलं जात आहे. अद्याप जीवीतहानी झाल्याची कोणतीही माहिती समोर आलेली नाही. "अचानक झटका बसला आणि रेल्वेचा डबा उलटला. रेल्वेचे दोन ते चार डबे पूर्णपणे उलटले आहेत", अशी माहिती प्रत्यक्षदर्शी प्रवाशानं दिली आहे.