अहमदाबाद - गुजरातमध्ये एका बिहारी तरुणाची हत्या करण्यात आल्याचा धक्कादायक प्रकार घडला आहे. गुजरातच्या गया येथील केडिया गावात अरमजीत नावाचा हा मूळचा बिहारी युवक राहात होता. शुक्रवारी रात्री कामावरुन घरी परत येत असताना, काही अज्ञातांनी अमरजीतवर लोखंडी रॉडने हल्ला करत त्याला ठार केले. या घटनेने जिल्ह्यात खळबळ उडाली असून गुजरात हिंसेचाचा हा भाग असल्याचा आरोप अमरजीतच्या कुटुंबीयांनी केला आहे.
गुजरातच्या सांबरकांठा जिल्ह्यात बिहारमधील एका युवकाने 14 महिन्यांच्या चिमुकलीवर बलात्कार केला होता. त्यानंतर, गुजराती लोकांनी येथील उत्तर भारतीयांवर हल्ले करण्यास सुरुवात केली. तसेच उत्तर भारतीय नागरिकांना, मूळत: बिहार आणि उत्तर प्रदेशातील रहिवाशांना पिटाळून लावले. या हिंसाचारामुळे जवळपास 20 हजार उत्तर भारतीयांनी गुजरातमधून पलायन केलं आहे. याप्रकरणी आत्तापर्यंत पोलिसांनी 431 जणांना अटक केली असून 56 जणांविरुद्ध गुन्हा दाखल केला आहे. त्यामुळे, बिहारमधील युवकाच्या मृत्युलाही ही घटनाच कारणीभूत असून त्यातून तरुणाची हत्या करण्यात आल्याची प्राथमिक माहिती आहे.