लखनऊ: उत्तर प्रदेशची राजधानी लखनऊमध्ये एक धक्कादायक प्रकार घडला आहे. भररस्त्यात एका तरुणीनं कॅब चालकाला मारहाण केली आहे. वाहतूक पोलिसांसमोर हा संपूर्ण प्रकार घडला. या घटनेचा व्हिडीओ सोशल मीडियावर व्हायरल झाला असून त्यात तरुणी चालकाला मारहाण करत असल्याचं स्पष्ट दिसत आहे. या प्रकरणाचा तपास सुरू असल्याचं पोलिसांनी सांगितलं आहे. मात्र पोलिसांसमोर हा संपूर्ण घडत असताना त्यांनी घेतलेली भूमिका संशयास्पद आहे. मारकुट्या तरुणीला अटक करण्याची मागणी सोशल मीडियावर केली जात आहे.
सोशल मीडियावर व्हायरल झालेल्या व्हिडीओमध्ये रस्त्यावरून गाड्या जात असताना रस्ता ओलांडत असल्याचं दिसत आहे. तरुणी एका कारसमोर येताच चालकानं कार थांबवली. मात्र तरुणीनं अपघात झाल्याचा आरोप करत उबर चालकाला जबर मारहाण केली. भररस्त्यात तरुणीनं चालकाच्या अनेकदा श्रीमुखात भडकावली. तिनं चालकाचा मोबाईल काढून घेतला आणि तो तोडला. यावेळी एक तरुण चालकाच्या मदतीला आला. तरुणीनं त्याच्याशीही हुज्जत घातली. या घटनेचा व्हिडीओ आता सोशल मीडियावर व्हायरल झाला आहे.
वजीरगंजमध्ये वास्तव्यास असलेल्या इनायत अलींचा लहान भाऊ सहादत अली उबर कार चालवतो. सहादत शुक्रवारी रात्री सरोजनीनगर परिसरातून प्रवाशाला सोडून परतत होता. लाल सिग्नल असल्यानं तो कृष्णानगरच्या चौकात थांबला होता, असं इनायत यांनी सांगितलं. यावेळी एक तरुणी रस्ता ओलांडत होती. नीट गाडी चालव म्हणत ही तरुणी सहादतवर संतापली. तिनं कॉलर धरून सहादतला कारच्या बाहेर काढलं. चालक माझ्या अंगावर गाडी चढवत असल्याचं म्हणत तिनं आरडाओरडा केला. सहादतला तिनं अनेकदा थोबाडीत मारली आणि त्याचा फोनही तोडला.