मुंबई : कामगार नेते आणि माजी संरक्षणमंत्री जॉर्ज मॅथ्यू फर्नांडिस यांचे दीर्घ आजाराने निधन झाले. वयाच्या 88व्या वर्षी त्यांनी नवी दिल्लीतल्या मॅक्स केअर रुग्णालयात मंगळवारी अखेरचा श्वास घेतला.
जॉर्ज फर्नांडिस यांच्या निधनानंतर राष्ट्रवादी काँग्रेसचे प्रमुख शरद पवार यांनी शोक व्यक्त केला आहे. सामान्यांच्या – कामगारांच्या अस्मितेसाठी सतत लढा देणारा नेता आज आपण गमावला आहे. ते माझे व्यक्तिगत मित्र होते. त्यांच्या निधनाने एका ज्येष्ठ सहकाऱ्याला मी मुकलो आहे, अशा शब्दांत शरद पवार यांनी जॉर्ज फर्नांडिस यांच्या निधनाबद्दल आपल्या भावना व्यक्त केल्या आहेत.
शरद पवार यांनी फेसबुकवर पोस्ट केली आहे. ते म्हणाले, देशातील कामगार चळवळीला बळ आणि नवी दिशा देणारे लढवय्ये नेत जॉर्ज फर्नांडिस यांचे प्रदीर्घ आजाराने निधन झाले याचे मला मोठे दु:ख झाले आहे. जॉर्ज हे १९४९ च्या सुमारास मुंबईत आले आणि मुंबईचे झाले. मुंबईत कामगारांच्या समस्यांना वाचा फोडण्यासाठी, त्यांना न्याय देण्यासाठी फर्नांडिस यांनी स्वत:ला झोकून दिले. मुंबई मनपा कर्मचाऱ्यांची सशक्त संघटना उभारली. रेल्वे कामगार संघटनांची जबाबदारी समर्थपणे सांभाळली.
ते एक उत्तम संसदपटू तर होतेच परंतु देशाचे उद्योगमंत्री व संरक्षणमंत्री पदाची जबाबदारी सांभाळताना एक प्रभावी प्रशासक म्हणून स्वत:चा वेगळा ठसा उमटवला. जॉर्ज एक निष्णात वाकपटू होते. विविध भाषांवरील त्यांचे प्रभुत्व वाखाणण्याजोगे होते. अशी स्वत:ची स्वतंत्र ओळख निर्माण करणारा, सामान्यांच्या – कामगारांच्या अस्मितेसाठी सतत लढा देणारा नेता आज आपण गमावला आहे. ते माझे व्यक्तिगत मित्र होते. त्यांच्या निधनाने एका ज्येष्ठ सहकाऱ्याला मी मुकलो आहे, असेही शरद पवार म्हणाले.