श्रीनगर - जम्मू काश्मीरमधील कुपवाडा जिल्ह्यातील हंदवाडामध्ये लपून बसलेल्या चार दहशतवाद्यांना अटक करण्यात भारतीय जवानांना यश आलं आहे. दहशतवाद्यांसोबत झालेल्या चकमकीनंतर जवानांनी त्यांना अटक केली. तसेच घटनास्थळावरून मोठ्या प्रमाणात शस्त्रास्त्र जप्त करण्यात आली आहेत. अटक करण्यात आलेले चारही दहशतवादी हे नवीन दहशतवादी संघटना अल बद्रचे दहशतवादी आहेत.
भारतीय लष्काराला काही दहशतवादी घुसखोरीच्या प्रयत्नात असल्याची माहिती मिळाली होती. लष्कराच्या जवानांनी परिसरात सर्च ऑपरेशन सुरु केले. त्यावेळी दहशतवाद्यांनी जवानांवर गोळीबार करुन पळ काढण्याचा प्रयत्न केला. मात्र, जवानांनी दिलेल्या चोख प्रत्युत्तरामुळे दहशतवाद्यांचे पळून जाणे अपयशी ठरले. जवानांना चार दहशतवाद्यांना अटक करण्यात यश आले. तसेच चौघांकडून शस्त्रास्त्रे देखील जप्त करण्यात आली आहेत.