हैदराबाद - दक्षिणेतील प्रसिद्ध अभिनेत्री आणि बाहुबली फेम तमन्ना भाटियाला चप्पल फेकून मारण्याचा प्रयत्न झाला. तमन्ना हैदराबादच्या हिमायतनगरमध्ये एका ज्वेलरी शॉपच्या उदघाटनाला गेलेली असताना ही घटना घडली. पोलिसांनी या प्रकरणी 31 वर्षाच्या तरुणाला अटक केली असून तो बी-टेकमध्ये पदवीधर आहे. आरोपीने तमन्नाच्या दिशेने फेकलेली चप्पल तिथे उभ्या असलेल्या ज्वेलरी शॉपच्या कर्मचा-याला जाऊन लागली.
ज्याने हे कृत्य केले तो तमन्नाचा चाहता असून तमन्नाच्या चित्रपट निवडीवर तो संतापला होता. आपला राग व्यक्त करण्यासाठी त्याने अशा प्रकारचे कृत्य केले. तमन्नाच्या दिशेने चप्पल फेकल्यानंतर घटनास्थळी एकच गोंधळ उडाला. तमन्नाने अलीकडे चित्रपटात ज्या भूमिका केल्या आहेत त्या आपल्याला अजिबात आवडलेल्या नाहीत. त्याच रागातून आपण हा हल्ला केला असे आरोपीने पोलिसांना चौकशीत सांगितले. वेगवेगळया कलमांखाली त्याच्या विरोधात गुन्हा नोंदवण्यात आला आहे.
सोशल मीडियावर सध्या या घटनेचा व्हिडीओ व्हायरल झाला आहे. बाहुबली चित्रपटाचे दोन भाग आले असून पहिल्या भागातील तिची भूमिका भरपूर गाजली. या रोलने तिच्याबद्दल अनेकांच्या मनात आकर्षण निर्माण केले आहे. प्रभासच्या नायिकेचा रोल तिने केला आहे. काही दक्षिणात्य चित्रपटांसह हिंदी चित्रपटही तमन्नाकडे आहेत.