27 वर्षीय मॉडेल दिव्या पाहुजाची हरियाणातील गुरुग्राममध्ये हत्या करण्यात आली. दिव्या पाहुजाची एका हॉटेलमध्ये हत्या करून तिच्या मृतदेहाची विल्हेवाट लावण्यासाठी मृतदेह नेण्यात येत होता. यावेळी पोलिसांनी आरोपी हॉटेल मालकासह अन्य दोन साथीदारांना अटक केली आहे.
दिव्या पाहुजा ही हरियाणातील गुरुग्राममधील बलदेव सिंह नगर येथील रहिवासी होती. दिव्या तिच्या गँगस्टर बॉयफ्रेंडच्या मुंबईतील एन्काऊंटरमध्ये आरोपी होती. गँगस्टर संदीप गडोलीची 7 फेब्रुवारी 2016 रोजी मुंबईतील एका हॉटेलमध्ये हत्या करण्यात आली होती.
कोण होती दिव्या पाहुजा?
गुरुग्रामच्या बलदेव नगरमध्ये राहणारी दिव्या पाहुजा हिची गँगस्टर संदीप गडोलीसोबत मैत्री होती. दिव्याने बी.कॉममध्ये शिकण्यासाठी प्रवेशही घेतला होता आणि याच दरम्यान तिने मॉडेलिंगला सुरुवात केली होती. दिव्याचे वडील दिव्यांग असून ते भाजीपाला आणि फळे विकण्याचं काम करतात.
दिव्याच्या कुटुंबात एक लहान बहीण आणि आई-वडील आहेत. दिव्या 18 वर्षांची असताना तिला 2016 मध्ये अटक करण्यात आली होती. आता 2023 मध्ये ती सात वर्षांनी तुरुंगातून बाहेर आली. गँगस्टरच्या हत्येप्रकरणी दिव्याच्या आईलाही अटक करण्यात आली होती.
का झाली हत्या?
दिव्या पाहुजा हिची आरोपी हॉटेल मालक अभिजीत सिंहसोबत मैत्री होती. 2 जानेवारी रोजी आरोपी अभिजीत सिंह दिव्या पाहुजासोबत हॉटेल सिटी पॉइंटमध्ये आला होता. दिव्याच्या फोनमधून त्याचे अश्लील फोटो डिलीट करायचे होते, मात्र दिव्याने त्याला फोनचा पासवर्ड सांगितला नाही.
रागाच्या भरात आरोपी अभिजीतने दिव्या पाहुजाची गोळ्या झाडून हत्या केली. नंतर हॉटेलमध्ये साफसफाई आणि रिसेप्शनचे काम करणारे हेमराज आणि ओमप्रकाश यांच्यासह मृतदेह बीएमडब्ल्यू कारमध्ये ठेवण्यात आला. यानंतर आरोपी अभिजीतने त्याच्या इतर दोन साथीदारांना बोलावून मृतदेहाची विल्हेवाट लावण्यासाठी कार दिली.