जर तुम्ही दर दिवशी हायवेवरून प्रवास करत असाल आणि वारंवार तुम्हाला टोल भरण्यास अडचण येत असेल तर सरकारने तुमच्यासाठी एक फायदेशीर योजना घोषित केली आहे. केंद्र सरकारने FASTag आधारित वार्षिक पास योजना सुरू करण्याची घोषणा केली आहे. येत्या १५ ऑगस्ट २०२५ पासून देशभरात ही योजना लागू होईल. या योजनेतून लाखो वाहन चालक आणि प्रवाशांना दिलासा मिळेल.
काय आहे वार्षिक पास योजना?
हा पास विशेषत: खासगी वाहन चालवणाऱ्यांसाठी तयार करण्यात आला आहे. ज्यात कार, जीप, व्हॅनसारख्या वाहनांचा समावेश असेल. या पासची किंमत ३ हजार असेल. या पास अंतर्गत वाहन चालक एक वर्षाच्या कालावधीत जास्तीत जास्त २०० वेळा टोलमधून प्रवास करू शकतात. त्याचा अर्थ वारंवार टोल भरण्यापासून सुटका होईल.
या योजनेची मुख्य वैशिष्टे?
- एकदा ३ हजार भरल्यानंतर पूर्ण वर्ष टोलसाठी वारंवार पेमेंट करण्याची गरज नाही.
- हा पास राष्ट्रीय हायवेवरील सर्व टोल नाक्यासाठी लागू असेल
- वेळ आणि इंधन बचत - टोल नाक्यावर अधिक वेळ थांबून इंधन वाया जाणे थांबेल. लांब रांगा आणि कॅश पेमेंटची अडचण कमी होईल.
- स्थानिक प्रवासात लाभदायक - ६० किमी अंतरात येणाऱ्या जाणाऱ्यांना वारंवार टोल देण्याची गरज नाही. त्यामुळे रोज प्रवास करणाऱ्या खासगी वाहन धारकांना त्याचा फायदा होईल.
- एका दिवसात कितीही करा प्रवास - बऱ्याचदा टोल नाक्यावर २४ तासांत रिटर्न येणाऱ्यांना टोलमधून काही सूट दिली जाते. मात्र या पासामुळे दिवसभरातून कितीही वेळा टोलमधून प्रवास करता येईल. परंतु वर्षाला २०० हून अधिक वेळा टोल क्रॉस करता येणार नाही हे लक्षात ठेवा.
कुणाला होणार अधिक फायदा?
या योजनेचा सर्वात जास्त फायदा रोज ऑफिस आणि बिझनेस ट्रॅव्हल करणाऱ्या लोकांना होणार आहे. जे लोक नेहमी लॉग्न ड्राईव्ह अथवा रोड ट्रिप्सवर जातात. त्यांच्यासाठी हा उत्तम पर्याय आहे. ही योजना केवळ पैसे वाचवणार नाही तर वेळ, इंधनही वाचवणार आहे. त्याशिवाय टोल नाक्यावर होणारे वाद, चुकीची टोल कपात आणि रिफंडसारख्या समस्याही खूप प्रमाणात कमी होतील.
पास घेण्याची प्रक्रिया कशी असेल?
वार्षिक पास घेणे खूप सोपे आहे. सरकारची ही नवी योजना असल्याने NHAI आणि मिनिस्ट्री ऑफ रोड ट्रान्सपोर्ट अँन्ड हायवे यांच्या वेबसाईटवर आणि हायवे ट्रॅव्हल APP वर नवीन पोर्टल सुरू केले जाईल. तिथून लोक ऑनलाईन अर्ज करू शकतील. तिथून तुमच्याकडे असलेल्या FASTag अकाऊंटशी लिंक करता येईल.