कोलकाता- कोलकातामध्ये मेट्रोत मिठी मारणाऱ्या एका जोडप्याला काही सहप्रवाशांनी बेदम मारहाण केल्याची घटना घडली आहे. सोमवारी रात्री कोलकाता मेट्रोमध्ये ही घटना घडली. मेट्रोमध्ये प्रवास करत असलेल्या काही वरिष्ठ नागरिकांना मेट्रोमध्ये त्या जोडप्याचं मिठी मारणं खटकलं. म्हणून त्यांनी जोडप्याबरोबर वाद घालत त्यांना मारहाण केली. मेट्रोमध्ये असलेल्या काही वरिष्ठ प्रवाशांनी त्या दोघांना अपमानाप्तद प्रश्न विचारत लाथा-बुक्क्यांनी मारहाण केली.
दरम्यान, या प्रकरणी कुठलीही तक्रार दाखल झाली नसल्याने तपास करणं कठीण जात आहे, असं कोलकाता मेट्रोचे सीपीआरओ इद्राणी बॅनर्जी यांनी म्हटलं. कोलकाता मेट्रो अशा घटनांचा तीव्र विरोध करतं, असंही ते म्हणाले.
कोलकाता येथील खासगी कंपनीत काम करणारा तरुण तिच्या मैत्रिणीसह मेट्रो ट्रेनने जात होता. प्रवासादरम्यान त्यांनी एक- दोनदा मिठी मारली. यावरुन मेट्रोमधील काही प्रवासी आक्रमक झाले. त्यांनी थेट त्या दोघांना मारहाण केली. .डमडम मेट्रो स्थानकात या युगूलाला खाली उतरवण्यात आलं. यानंतरही त्यांना मारहाण करण्यात आली. जमावाने तरुणाला मारहाण केली. तर त्याला वाचवण्याचा प्रयत्न करणाऱ्या तरुणीसोबतही असभ्य वर्तन करण्यात आले. दुसऱ्या डब्यातील काही प्रवाशांनी शेवटी त्या दोघांची मदत केली.
दरम्यान, या घटनेचा निषेध करण्यासाठी डमडम मेट्रो स्टेशनच्या बाहेर मंगळवारी निदर्शनं करण्यात आली.