नवी दिल्ली – चीनच्या वुहान शहरातून पसरलेल्या कोरोना व्हायरसनं जगभरात संकट उभं केले आहे. बहुतांश देशांनी कोरोनापासून वाचण्यासाठी लॉकडाऊन जाहीर केले आहे. भारतात ३ मे पर्यंत लॉकडाऊन करण्यात आला आहे. मागील काही दिवसांपासून देशातील १३० कोटी जनता घरातच क्वारंटाईन आहे. लॉकडाऊनमुळे अत्यावश्यक सेवा वगळता इतर कोणालाही विनाकारण घराबाहेर पडण्यास बंदी आहे.
या लॉकडाऊन काळात फक्त सामान्य व्यक्ती नव्हे तर अनेक व्हीव्हीआयपी लोकही कुठे येऊ-जाऊ शकत नाहीत. पंतप्रधान नरेंद्र मोदी स्वत: त्यांच्या निवासस्थानातून वर्क फ्रॉम होम करत आहेत. पंतप्रधान नरेंद्र मोदी यांना परदेशात जाऊन आज ५ महिने ६ दिवस झाले आहेत. गेल्या ६ वर्षात पहिल्यांदा अशी वेळ आली आहे की, इतके दिवस पंतप्रधान नरेंद्र मोदी यांना भारतातच राहावं लागलं आहे.
यापूर्वी मोदींनी २०१६-१७ मध्ये ६ महिने परदेश दौरा केला नव्हता. त्यावेळी नरेंद्र मोदी १२ नोव्हेंबर २०१६ रोजी जपानहून परत आले आणि त्यानंतर ११ मे २०१७ रोजी श्रीलंकेला गेले. मात्र, त्यावेळी देशात निवडणुका होत्या. मार्च २०१७ मध्ये उत्तर प्रदेशसह ५ राज्यात निवडणुकांचा काळ होता. नरेंद्र मोदी पंतप्रधान झाल्यापासून जवळपास ५ वर्षे ११ महिने झाले आहेत. २६ मे २०१४ रोजी पहिल्यांदा पंतप्रधान म्हणून आणि ३० मे २०१९ रोजी दुसऱ्यांदा मोदींनी शपथ घेतली. पंतप्रधान कार्यालयाच्या संकेतस्थळावर उपलब्ध माहितीनुसार मोदींनी २०१४ पासून आतापर्यंत ५९ वेळा परदेश दौरा केला आहे. यावेळी त्यांनी १०६ देशांमध्ये प्रवास केला आहे. मोदी पंतप्रधान झाल्यापासून दरवर्षी दहापेक्षा जास्त परदेश दौरा करतात.
डिसेंबर २०१८ मध्ये राज्यसभेत दिलेल्या उत्तरात तत्कालीन परराष्ट्र राज्यमंत्री जनरल व्ही. के. सिंह यांनी पंतप्रधानांच्या परदेश दौर्यावर झालेल्या खर्चाची माहिती दिली होती. यानुसार, २०१८-१९ पर्यंत मोदींच्या परदेश प्रवासात २ हजार कोटी रुपये खर्च झाले होते. यानंतर, मोदींनी १४ परदेश दौरा केला त्यात ९० कोटी ७० लाख खर्च झाला. तथापि, या खर्चामध्ये पंतप्रधानांच्या विमानांची देखभाल आणि हॉटलाईनचा समावेश नव्हता.
पंतप्रधान मोदी नोव्हेंबर २०१६ ते मे २०१७ दरम्यान कोणत्याही परदेश दौर्यावर गेले नाहीत. याचे एक कारण असे होते की, त्यावेळी उत्तर प्रदेश, उत्तराखंड, पंजाब, गोवा आणि मणिपूरमध्ये विधानसभा निवडणुका होत्या. या 5 राज्यात मोदींनी नोव्हेंबर २०१६ ते मार्च २०१७ दरम्यान ३८ दौरे केले. यापैकी जास्तीत जास्त २७ दौरे एकट्या उत्तर प्रदेशात झाले. याठिकाणी निवडणुकीत भाजपाने इथल्या ४०३ पैकी ३२५ जागा जिंकल्या. ५ पैकी ४ राज्यात भाजपाने सरकार स्थापन केले. फक्त पंजाबमधील सरकार गमवावे लागले होते.
आणखी वाचा...
लॉकडाऊनमुळे नरेंद्र मोदी लोकप्रियतेच्या शिखरावर; ट्रम्प संकटात
एड्स, स्वाईन फ्ल्यू अमेरिकेतून पसरला; कोणी जबाबदार धरले का? चीनचा सवाल
फेसबुक-Reliance Jioचा 'मेगा प्लॅन'; तीन कोटी दुकानदार, शेतकरी होणार मालामाल
हास्यास्पद! पाकिस्तानात ६० वर्षांचा वृद्ध 'गर्भवती'; खासगी लॅब सील करण्याची वेळ