नवी दिल्ली : केंद्र सरकारने आपल्या कर्मचाऱ्यांच्या महागाई भत्त्यात (डीए) तसेच निवृत्तिवेतनधारकांच्या महागाई दिलाशात (डीआर) बुधवारी ३ टक्के वाढ केली. त्यामुळे केंद्रीय कर्मचारी व निवृत्तिवेतनधारकांच्या घरात दिवाळीपूर्वीच दिवाळी आली आहे. निर्णयाचा १.१५ कोटी केंद्रीय कर्मचारी व निवृत्तिवेतनधारकांना लाभ होईल.
दिलेली ३ टक्के वाढ पूर्वलक्षी प्रभावाने १ जुलै २०२४ पासून लागू होईल. त्यापोटी केंद्र सरकारच्या तिजोरीवर ९,४४८ कोटी रुपयांचा बोजा पडेल. कर्मचारी व निवृत्त कर्मचाऱ्यांच्या डीए व डीआरमधील वाढ ठरवताना सर्वाधिक ताज्या औद्योगिक कामगार-ग्राहक किंमत निर्देशांकाच्या आकडेवारीचा आधार घेतला जातो. हा निर्देशांक केंद्रीय मंत्रालयांतर्गत काम करणाऱ्या श्रम ब्युरोकडून दर महिन्याला जारी केला जातो. डीए व डीआर वाढ निश्चितीसाठी सातव्या वेतन आयोगाचा फॉर्म्युला वापरला जातो.