अहमदाबाद - पाटीदार नेता हार्दिक पटेल याचे कथित सेक्स व्हिडीओ सध्या गुजरातमधील राजकीय वादविवादाचा विषय बनले आहेत. हार्दिक पटेल याचे अजून चार कथित सेक्स व्हिडीओ लीक करण्यात आले आहेत. दरम्यान हार्दिक पटेलने 23 वर्षाच्या तरुणाची गर्लफ्रेंड असू शकत नाही का ? मग काय 50 वर्षाच्या व्यक्तीची असणार का ? असा प्रश्न विचारला आहे. इंडियन एक्स्प्रेसला दिलेल्या मुलाखतीत हार्दिक पटेलने व्हिडीओमधील व्यक्ती आपण नसून, ही बनावट सीडी असल्याचा दावा केला आहे.
कथित सेक्स सीडी समोर आल्यानंतर पाटीदार नेता हार्दिक पटेल भरुच येथील सरभन गावात सभेसाठी पोहोचला होता. यावेळी 10 गावातील लोक या सभेसाठी उपस्थित होते. मोठ्या थाटामाटात हार्दिक पटेलचं स्वागत करण्यात आलं. यावेळी हार्दिकने जवळपास 33 मिनिटांचं भाषण करत जनतेला भाजपाची हिटलरशाही नाकारण्याचं आवाहन केलं.
यावेळी हार्दिक पटेलला व्हिडीओमुळे तुझ्या मोहिमेला काही धक्का बसेल का ? असं विचारलं असता त्याने सांगितलं की, 'जनतेचा मिळणारा पाठिंबा तुम्ही पाहत आहात. या व्हिडीओमुळे मला काही नुकसान होईल असं तुम्हाला वाटतं का ? मला काहीही फरक पडणार नाहीये. भाजपामध्ये असलेली अस्वस्थता आणि आपल्या कमतरता लपवण्यासाठी सुरु असलेली धडपड यामधून दिसत आहे. ते मला धमकावू किंवा ब्लॅकमेल करु शकत नाहीत. यासाठीच एका 23 वर्षीय तरुणाच्या चारित्र्यावर शिंतोडे उडवणारा व्हिडीओ तयार केला आहे'.
'सत्तेत बसलेले लोक दावा करत आहेत की हा माझा व्हिडीओ आहे. पण माझं म्हणणं आहे की हा बनावट आहे. हा व्हिडीओ माझ्यासारख्या दिसणा-या एखाद्या व्यक्तीचा आहे. हा व्हिडीओ मी परदेशात राहणा-या माझ्या काही ओळखीच्या लोकांना फॉरेन्सिक चाचणी कऱण्यासाठी पाठवला होता. त्यांनी दिलेल्या माहितीनुसार हा व्हिडीओ बनावट आहे', असं हार्दिक पटेलने सांगितलं आहे.
'आणि काही वेळासाठी मान्यही केलं की व्हिडीओमधील व्यक्ती मी आहे, तरी मला विचारायचं आहे की 23 वर्षाच्या तरुणाची गर्लफ्रेंड असू शकत नाही का ? जर का 23 वर्षाच्या तरुणाची गर्लफ्रेंड नसेल, तर काय मग 50 वर्षाच्या व्यक्तीची असणार का ? अटलबिहारी वाजपेयी एकदा बोलले होते की, मी विवाहित नाहीये, पण संन्याशीही नाही. एका भाजपा आमदाराने चालत्या बसमध्ये तरुणीवर बलात्काराचा प्रयत्न केला, पण त्यावर भाजपा काहीच बोलत नाही. ही लढाई भाजपा विरुद्ध काँग्रेस नाही, तर भाजपा विरुद्ध हार्दिक आहे', असं हार्दिक पटेलने सांगितलं आहे.