नवी दिल्ली - प्रेमासाठी अनेक लोक वाटेल ते करतात. प्रेमाचे अनेक भन्नाट किस्से देखील पाहायला मिळतात. बिहारमधील जमुई जिल्ह्यात एका तरुणाला त्याच्या विवाहित प्रेयसीला भेटण्यासाठी गुपचूप येणं चांगलंच महागात पडलं आहे. ही घटना चकाई पोलीस ठाण्याच्या हद्दीतील सरौन संगुटोल गावातील आहे. येथे रात्रीच्या अंधारात एक तरुण आपल्या विवाहित प्रेयसीला भेटण्यासाठी गुपचूप आला. मात्र या दोघांच्या भेटीची माहिती कुटुंबीय आणि गावकऱ्यांना लागली, त्यानंतर त्यांनी त्या तरुणाला पकडून त्याच महिलेशी लग्न लावून दिलं.
मिळालेल्या माहितीनुसार, कांचन देवी या महिलेचे मुकेश दाससोबत 2013 पासून प्रेमसंबंध होते. कांचनच्या घरच्यांना तिचं भेटणं आणि मुकेशच्या प्रेमात पडणं पसंत नव्हतं. 2018 मध्ये, कांचनचे लग्न झारखंडच्या गिरिडीह जिल्ह्यातील रहिवासी असलेल्या कामदेव दासशी केले. मात्र लग्नानंतरही कांचन तिच्या प्रियकराला विसरली नाही. लग्नानंतर कांचन एका मुलाची आई झाली, पण ती वेळोवेळी प्रियकर मुकेशला भेटत राहिली.
सासरच्या घरात त्याचे अनेकदा भांडण होत असे. कांचनचा नवरा सुरत येथे मजुरीचे काम करतो. माहेरी राहणाऱ्या कांचनने बोलवल्यानंतर मुकेश शनिवारी रात्री तिच्या घरी पोहोचला होता. मात्र घरच्यांना याची माहिती मिळताच त्यांनी प्रियकर मुकेशला पकडले. याची माहिती मिळताच ग्रामस्थांनी तेथे गर्दी केली. यानंतर दोघांचे लग्न करायचे ठरले आणि त्यांनी लग्न लावून दिलं.
एका विवाहित महिलेचा तिच्या प्रियकरासोबत लग्न झाल्याचा व्हिडीओ सोशल मीडियावर जोरदार व्हायरल होत आहे. त्यानंतर पती-पत्नी बनलेल्या कांचन आणि मुकेश यांनी चकाई पोलीस ठाणे गाठून पोलिसांसमोर सर्व प्रकार सांगितला. त्यानंतर दोघांकडून बाँड भरून घेतल्यानंतर पोलिसांनी महिलेला तिच्या पतीसह पाठवले. या घटनेची सर्वत्र जोरदार चर्चा होत आहे. एका हिंदी वेबसाईटने याबाबतचे वृत्त दिले आहे.