पाटणा - जेडीयूचे नेते नितीश कुमार यांनी अगदी सावध आणि शांतपणे पावले उचलत बिहारच्या सत्तेतून भाजपाला बाहेरचा रस्ता दाखवला आहे. दरम्यान, भाजपावरबिहारमध्ये ओढवलेल्या नामुष्कीसाठी एका ज्येष्ठ नेत्याला साईडलाईन करणं कारणीभूत असल्याचं बोललं जात आहे. या नेत्याचं नाव आहे सुशील कुमार मोदी. बिहारमधील गेल्या विधानसभा निवडणुकीपर्यंत सुशील कुमार मोदी हे भाजपाच्या प्रमुख नेत्यांपैकी एक होते. मात्र २०२० च्या विधानसभा निवडणुकीनंतर पक्षश्रेष्ठींनी सुशील कुमार मोदींना बिहारच्या राजकारणातून दूर करत त्यांना राज्यसभेचे सदस्यत्व देत दिल्लीत आणले. मात्र भाजपाची हीच खेळी आता पक्षाला महागात पडल्याचे दिसत आहे.
बिहारच्या राजकारणात सुशील कुमार मोदी यांना सत्तेचं सूत्रधार म्हणून ओळखले जाते. एप्रिल २०१७ मध्ये मोदी यांनी लालू प्रसाद यादव यांच्या कुटुंबीयांवर आरोपांच्या तुफान फैरी झाडण्यास सुरुवात केली होती. त्याचा परिणाम म्हणून नितीश कुमार आणि लालू प्रसाद यादव यांच्या पक्षांमधील महाआघाडी फुटून जुलै २०१७ मध्ये नितीश कुमार पुन्हा एकदा भाजपासोबत आले होते. मात्र सुशील कुमार मोदी बिहारच्या राजकारणातून दूर होताच भाजपाच्या नशिबी पुन्हा एकदा राजकीय वनवास आला आहे.
नितीश कुमार पुन्हा भाजपासोबत आल्यानंतर भाजपा आणि जेडीयू हे २०१९ च्या लोकसभा निवडणुकीत एकत्र लढले होते. त्या निवडणुकीत बिहारमध्ये एनडीएला ४० पैकी ३९ जागा मिळाल्या होत्या. तर २०२० मध्ये झालेल्या विधानसभा निवडणुकीतही एनडीएने चांगली कामगिरी करत विजय मिळवला होता. मात्र याचदरम्यान, सुशील कुमार मोदी यांचे पक्षांतर्गत विरोधक सक्रिय झाले. त्यातच त्यांची रवानगी राज्यसभेत करण्यात आली. सुशील कुमार मोदी यांच्याकडे पक्षाचा मोर्चा सांभाळण्याची हातोटी होती. नितीश कुमारही सुशील कुमार मोदी यांच्या बोलण्याकडे लक्ष देऊन असत. त्यांनी नाराजी व्यक्त केल्यास नितीश कुमार जेडीयूच्या नेत्यांना सबुरीने घेण्याचा सल्ला देत. मात्र भाजपाने सुशील कुमार मोदी यांना बिहारमधून बाजूला केले आणि भाजपासाठी सगळी समिकरणेच बिघडली.