नवी दिल्ली : पुणे पोलिसांनी डाव्या विचारांच्या ज्यांना अटक केली, त्यापैकी अनेकांना मी ओळखतो. त्यांची कोणतीही विचारसरणी असली तरी ते नक्षलवादी नक्कीच नाहीत, याची मला खात्री आहे. त्यांच्या घरी जाऊ न मी सारे तपशील समजावून घेणार आहे, असे प्रतिपादन शरद पवार यांनी येथे केले.
कर्नाटक व महाराष्ट्रात सनातन संस्थेच्या काही सदस्यांना अटक झाल्यानंतर जनतेचे लक्ष अन्यत्र वळवण्यासाठी महाराष्ट्र सरकारने बहुदा हे अटक व धाडसत्र केले असावे, अशी माहिती समजली आहे, असेही ते म्हणाले. पंतप्रधानपदाचा उमेदवार आज घोषित करण्याची आवश्यकता नाही. मी स्वत: उमेदवार नाही. सोनिया गांधी, देवेगौडा व मी अशा तिघांनी विविध पक्षांशी चर्चा करावी, प्रादेशिक स्तरांवर व्यवहार्य आघाड्यांची निर्मिती करावी असे सूत्र अनेकांनी सुचवले आहे. अर्थात याबाबत अंतिम निर्णय सर्वांशी बोलूनच ठरेल.