नवी दिल्ली : राफेल डीलच्या फाईल गोव्याचे मुख्यमंत्री पर्रीकर यांच्या बेडरुममध्ये असल्याच्या ऑडिओ क्लीपवरून अनिल अंबानी यांचे नाव राहुल गांधी यांनी घेताच लोकसभा अध्यक्षा सुमित्रा महाजन यांनी त्यांना रोखले. अनिल अंबानी हे संसदेचे सदस्य नसून त्यांचे नाव घेऊ शकत नाही, असे सांगताच राहुल यांनी अंबानी भाजपचे सदस्य नाहीत का, असा प्रश्न विचारला. यावरून झालेल्या गदारोळानंतर 8 मिनिटांसाठी कामकाज थांबविण्यात आले.
यानंतर राहुल गांधी पुन्हा बोलायला लागल्यावर त्यांनी अनिल अंबानी यांचे नाव भाजपच्या शैलीत ठेवले. अनिल अंबानींचे नाव घेऊ शकत नाही, पण त्यांना ''डबल ए'' तर म्हणू शकतो, असे सांगताच संसदेत एकच हशा पिकला. यानंतर राहुल गांधी यांनी पर्रीकर यांचा उल्लेख करताना गोव्याचे मुख्यमंत्री म्हटले यावरही अध्यक्षा महाजन यांनी आक्षेप घेतला. इथे गोव्याच्या मुख्यमंत्र्यांचा संबंध नसून संरक्षण मंत्र्यांचा आहे. यामुळे गोवा मुख्यमंत्री म्हणू नये.