अहमदाबाद विमान दुर्घटनेच्या अनेक कटू आठवणी आयुष्यभर लोकांच्या मनाला वेदना देत राहणार आहेत. या अपघातात कुणी मुलाला गमावले तर कुणी आईला, एकानेही त्याचे अख्खं कुटुंब गमावले. आता या दुर्घटनेतील आणखी एक हृदयद्रावक कहाणी समोर आली आहे जी ऐकून तुमच्याही डोळ्यात पाणी येईल. गुजरातच्या अहमदाबादहून लंडनला जाणाऱ्या एअर इंडिया विमानाचा अपघात झाला. या विमानात वैभव पटेल आणि जिनल गोस्वामी हे जोडपे होते, जे जिनलच्या ओटीभरणीच्या कार्यक्रमासाठी अहमदाबादला आले होते.
२९ वर्षीय वैभव पटेल आणि २७ वर्षीय जिनल गोस्वामी काही दिवसातच आई वडील भूमिकेत येणार होते. जिनल ७ वर्षाची गर्भवती होती. ती काही दिवसांतच तिच्या बाळाला जन्म देणार होती. वैभव आणि जिनल या दोघांच्या कुटुंबात आनंदाचे वातावरण होते. घरातील नव्या सदस्याच्या स्वागतासाठी कुटुंब आतुरले होते. २ जून रोजी कुटुंबाने पारंपारिक पद्धतीने ओटीभरणीचा कार्यक्रम केला. १२ जूनला अहमदाबाद विमान दुर्घटनेत २७४ जणांचा मृत्यू झाला. त्यातील हे एक जोडपे होते. मूळचे वासना गावातील ते रहिवासी गेल्या काही काळापासून लंडनला राहायला होते.
वैभव आणि जिनलच्या आयुष्यात नवा पाहुणा येणार होता. मात्र त्याआधी ओटीभरणाच्या कार्यक्रमात जिनल आणि वैभव अहमदाबादला आले होते. त्यानंतर १२ जून रोजी ते लंडनसाठी निघाले. परंतु दुर्दैवाने ते ज्या विमानातून प्रवास करत होते ते एअर इंडियाचे विमान टेकऑफनंतर काही मिनिटांतच कोसळले आणि भीषण अपघात झाला. जिनल आणि वैभव यांच्या मृत्यूने कुटुंबाला मानसिक धक्का बसला आहे. २ जून रोजी होणाऱ्या कार्यक्रमासाठी ते भारतात आले होते. ७ महिन्याची गर्भवती असणारी जिनल तिच्या बाळाच्या आगमनाने खुश होती. घरातील सर्व तिच्या आनंदात सहभागी झाले होते. मात्र हा आनंद कायमचा हिरावून गेला आहे.
दरम्यान, २ दिवसापूर्वीच जिनलने मला फोन केला होता. ती घरी जाणार सांगत होती. आम्ही खूप चांगल्या मैत्रिणी होतो. एकत्र मजामस्ती करायचो. आम्ही संपूर्ण भारत भ्रमंती केली आहे. बऱ्याचदा गोवा, राजस्थानला गेलो. हा अपघात खूप वेदनादायी आहे. दुर्घटनास्थळी जी कृष्णाची मूर्ती सापडली, ती जिनलची असल्याचा दावा तिच्या कुटुंबासह मित्र मैत्रिणींनी केला आहे.