अहमदाबाद - गुजरातच्या विमान दुर्घटनेने संपूर्ण देशात हळहळ व्यक्त करण्यात येत आहे. या भीषण अपघातात २६५ लोकांचा जीव गेला आहे. त्यातील एक गुजरातचे माजी मुख्यमंत्री विजय रुपाणी हेदेखील होते. रूपाणी यांच्या मृत्यूबाबत विविध दु:खद योगायोग समोर आलेत. हा नशिबाचा क्रूर खेळ असावा म्हणून रुपाणी अपघातग्रस्त विमानातून प्रवास करत होते. लंडनला जाण्यासाठी रुपाणी यांचे हे तिसरे तिकिट होते. याआधी २ वेळा त्यांनी आपले तिकिट कॅन्सल केले आणि सर्व कामे आटोपून ते १२ जूनच्या एअर इंडियाच्या विमानाने लंडनला चालले होते आणि हेच प्लेन क्रॅश झाले. त्यात एक प्रवासी वगळता सर्वांचा मृत्यू झाला.
गुजरातचे माजी मुख्यमंत्री विजय रुपाणी यांच्या अखेरच्या प्रवासाबाबत अनेक हैराण करणाऱ्या गोष्टी समोर आल्यात. अहमदाबाद ते लंडन थेट विमान सेवेच्या ज्या फ्लाईटमध्ये त्यांचे निधन झाले ही सेवा त्यांनीच सुरु केली होती. विजय रुपाणी जेव्हा गुजरातचे मुख्यमंत्री होते तेव्हा अहमदाबाद ते लंडन थेट विमान सेवा नव्हती. प्रवाशांच्या वाढत्या मागणीमुळे विजय रुपाणी यांनी गुजरातच्या अहमदाबाद ते लंडन विमान सेवा सुरू करून लोकांना भेट दिली होती.
आणखी एक कनेक्शन त्यांच्या १२०६ या नंबरशी जोडले आहे. रुपाणी यांचे निधन १२ जून म्हणजे १२/०६ तारखेला झाले. हा नंबर त्यांच्यासाठी खास होता. त्यांना हा नंबर इतका आवडायचा की त्यांनी त्यांच्या कार, स्कूटरला हाच नंबर घेतला होता. आता नशिबाचा आणखी एक खेळ म्हणजे अहमदाबाद ते लंडन बोइंग ७८७ ड्रिमलायनर AI 171 विमानाचे हे त्यांचे तिसरे तिकिट होते. पहिले तिकिट १९ मे रोजी बुक केले होते. रुपाणी भाजपाचे पंजाबमधील प्रभारी होते. १९ जून रोजी लुधियाना पोटनिवडणुकीमुळे त्यांना हे तिकिट कॅन्सल करावे लागले. रुपाणी यांनी त्यानंतर ५ जून रोजी तिकिट काढले परंतु कौटुंबिक कारणास्तव त्यांना हे तिकीटही रद्द करावे लागले. त्यानंतर १२ जूनला त्यांनी लंडनला जाणारे तिकिट बुक केले आणि हाच त्यांचा अखेरचा प्रवास ठरला.
विजय रुपाणी याच एअर इंडियाच्या फ्लाईटमध्ये होते, जे १२ जून रोजी अहमदाबाद ते लंडनसाठी रवाना झाल्यानंतर काही मिनिटांतच खाली कोसळले. या विमानात २४२ प्रवाशी होते. ज्यातील २४१ लोकांचा जीव गेला. या भीषण अपघातात केवळ एकच व्यक्ती जिवंत वाचला. ज्याच्यावर रुग्णालयात उपचार सुरू आहेत. या अपघाताने देश सुन्न झाला आहे.