अयोध्या (उत्तर प्रदेश) : राममंदिराभोवती धार्मिक पर्यटन आणि जमिनीचे व्यवहार वाढल्याने अयोध्येत आठ वर्षांनंतर सर्कल रेट (म्हणजेच नोंदणीसाठी ठरवलेली किमान जमीन किंमत) मोठ्या प्रमाणात वाढवण्यात आला आहे. ही वाढ ३० टक्क्यांपासून २०० टक्क्यांपर्यंत झाली आहे. नवीन सर्कल दर सोमवारपासून (९ जूनपासून) लागू करण्यात आले आहेत. रामजन्मभूमी मंदिराच्या दहा किलोमीटर परिसरात जमिनीच्या किमतीत विशेषतः मोठी वाढ झाली असून, काही भागांमध्ये दर १५० टक्क्यांहून अधिक वाढले आहेत, असे स्थानिक प्रशासनाने सांगितले.
११ वर्षांच्या कार्यकाळात भारत बनला सर्वाधिक वेगाने वाढलेली अर्थव्यवस्था
सर्वाधिक महागडे परिसर?
ज्या भागांमध्ये जमीन व्यवहार सर्वाधिक होत आहेत तिथे दर सर्वाधिक वाढविले गेले. रकाबगंज, देवकली आणि अवध विहार निवासी योजना हे सध्या जिल्ह्यातील सर्वांत महागडे भाग ठरले आहेत. मंदिर परिसरातील दर आता प्रति चौ.मीटर २६,६०० ते २७,९०० रुपये इतके झाले आहेत. हे दर पूर्वी ६,६५० ते ६,९७५ रुपये होते.
वेगवेगळी दरवाढ
नवीन दरवाढ निवासी, व्यापारी आणि शेतीसाठी असलेल्या जमिनींसाठी वेगवेगळ्या प्रकारे केली गेली आहे. त्या भागातील मागणी आणि वापराच्या आधारावर हे दर निश्चित केले गेले.
बिल्डर म्हणतात...
अयोध्येतील एका बिल्डर कंपनीचे संचालक सौरभ विक्रम सिंह म्हणाले, “सर्कल रेट वाढल्यामुळे मुद्रांक शुल्क (स्टॅम्प ड्युटी) देखील वाढते.
मात्र याचा फायदा जमीनधारकांना होतो, कारण त्यांच्या जमिनीचे मूल्य वाढते. त्यामुळे कर्जासाठी मूल्यमापन करणे सोपे जाते. सर्कल रेट वाढवल्याने पांढरा आणि काळा पैसा यामधील फरक कमी होईल. त्यामुळे पारदर्शकता वाढेल.