नवी दिल्ली, दि. 19- गुरुग्रामच्या रायन इंटरनॅशनल स्कूलमध्ये झालेल्या सात वर्षीय मुलगा प्रद्युम्नच्या हत्येचे पडसाद सगळीकडेच पाहायला मिळत आहे. पालकांकडून या घटनेचा निषेध करत आंदोलन केलं गेलं. रायन इंटरनॅशनल स्कूलमध्ये घडलेल्या या घटनेमुळे एका व्यक्तीने त्याच्या 10 वर्षाच्या भाचीसोबत केलेलं कृत्य समोर आलं आहे. दिल्लीत एका १० वर्षांच्या मुलीला तिच्या आईने रायन स्कूलमध्ये घडलेल्या घटनेनंतर विश्वासात घेत 'गुड टच, बॅड टच' बद्दल सांगितलं. आईने सांगितलेल्या या गोष्टीनंतर त्या चिमुरडीने सगळ्यांनाच धक्का बसेल अशी घटना सांगितली. मुलीच्या सख्ख्या काकानेच त्या मुलीचा लैंगिक छळ केला होता. मुलीने सांगितलेली ही घटना ऐकुन तिच्या आईला ऐकून धक्का बसला. तिने याप्रकरणाची पोलीस स्टेशनमध्ये तक्रार केली आणि दीराला तुरूंगातही पाठवलं.
१० वर्षांची मुलगी बुराडी येथील उत्तरांचल कॉलनीत राहते. हे कुटुंब मूळचं उत्तराखंडचं आहे. आरोपी विनोद कुमार (३६) घरीच बांगड्या आणि इतर सामान विकायचा. एकत्र कुटुंब असल्यामुळे आरोपी या मुलीच्या कुटुंबासोबतच राहायचा. मे महिन्यात मुलगी घरी एकटी असताना आरोपीने तिच्यावर लैंगिक अत्याचार केले. नंतर मुलीला धमकावून गप्प राहायला सांगितलं. त्याच्या पुढल्याच महिन्यात जून २०१७ मध्ये त्याचं लग्न झालं. मुलगी घाबरून कोणालाच काही बोलली नाही, अशी माहिती पोलीस अधिकाऱ्यांनी दिली आहे.
रायन इंटरनॅशनलमध्ये प्रद्युम्नच्या हत्येची घटना टिव्ही, वृत्तपत्राच्या माध्यमातून लोकांसमोर आली. त्यानंतर या मुलीच्या आईने या घटनेसंदर्भातल्या बातम्या, चर्चा ऐकल्या होत्या. यानंतर काहीही झालं तर लपवून ठेवायचं नाही, असं त्या मुलीला तिच्या आईने प्रेमाने समजावलं. 10 वर्षाच्या मुलीला विश्वासात घेतल्यानंतर त्या मुलीने तिच्या आईला घटलेला सगळा प्रकार सांगितला. सख्ख्या काकाने केलंलं कृत्य तिने आईला सांगितलं. ही घटना समोर आल्यानंतर त्या मुलीची मेडीकल करण्यात आली, तसंच तिच्या मनातून या घटनेबद्दलची भीती काढण्यासाठी तिचं समुपदेशनही करण्यात आल्याचं पोलिसांनी सांगितलं आहे.