अहमदाबाद येथील विमानतळाजवळ झालेल्या भीषण विमान अपघातात प्रवाशांचा मृत्यू झाला असून, यात हरियाणातील कुरुक्षेत्र येथील रहिवासी अंजू शर्मा यांचाही समावेश आहे. लंडनला आपल्या मुलीला भेटायला जाण्याची त्यांची इच्छा अपूर्णच राहिली. या हृदयद्रावक घटनेमुळे अंजू यांच्या कुटुंबियांवर दुःखाचा डोंगर कोसळला आहे.
या अपघातापूर्वी अंजू यांनी सोशल मीडियावर "आदमी खिलौना है" अशी एक पोस्ट केली होती, जी पाहून शोकाकुल कुटुंबियांना असे वाटत आहे की, त्यांना कदाचित आपल्या मृत्यूची पूर्वकल्पना आली असावी.
मुलीला भेटायला लंडनला निघालेल्या...
अंजू शर्मा त्यांची मुलगी निम्मी शर्माला भेटण्यासाठी लंडनला जात होत्या. निवृत्त सैनिक जगदीश शर्मा यांची कन्या असलेल्या अंजू यांचे लग्न पंजाबमधील पटियाला जिल्ह्यात झाले होते, परंतु त्या गुजरातमधील वडोदरा येथे राहत होत्या. त्यांचे दिवंगत पती लोकर उद्योगात कार्यरत होते. अंजू या चित्रपट अभिनेता मिलन शर्मा यांच्या बहीण होत्या. त्यांची मोठी मुलगी लंडनमध्ये राहते, तर धाकटी मुलगी वडोदरा येथे वास्तव्यास आहे.
चार दिन की जिंदगी से अच्छे हैं, जिंदगी के दो चार पल!
अंजू शर्मा यांच्या एका नातेवाईकाने सांगितले की, त्यांनी दुपारी १:०६ वाजता एक स्टेटस पोस्ट केले होते, ज्यात लिहिले होते, "चार दिन की जिंदगी से अच्छे हैं, जिंदगी के दो चार पल। आदमी खिलौना है". अंजू यांना स्टेटस पोस्ट करायला खूप आवडायचे. अंजू यांचे नातेवाईक संजीव कुमार यांनी सांगितले की, त्या कुटुंबातील सर्वात मोठ्या होत्या आणि सर्वांची काळजी घेत असत. त्यांच्या निधनाने कुटुंबातील सर्व सदस्य अस्वस्थ असून त्यांना अश्रू आवरणे कठीण झाले आहे.
मृतदेहांची ओळख पटवण्याचे काम सुरू!
एअर इंडियाच्या बोईंग ड्रीमलायनर विमानाने दुपारी १:३८ वाजता उड्डाण केले. मात्र, उड्डाण केल्यानंतर काही वेळातच विमान वेगाने खाली येऊ लागले आणि विमानतळाजवळील मेडिकल कॉलेज कॅम्पसमध्ये कोसळले. कोसळताच विमानात मोठा स्फोट होऊन आग लागली. या दुर्घटनेत विमानात उपस्थित असलेल्या सर्व लोकांचा जागीच मृत्यू झाला. मृतदेहांची स्थिती अत्यंत वाईट असल्याने त्यांची ओळख पटवणे कठीण झाले आहे. नातेवाईकांकडून डीएनए नमुने घेऊन ओळख पटवण्याचे काम सध्या सुरू आहे.