औरैया: उत्तर प्रदेशातील औरैया जिल्ह्यात बिधुना येथे एक अनोखा विवाह पाहायला मिळाला. ३० वर्षीय रक्षा सोलंकी नावाच्या तरुणीने चक्क भगवान श्रीकृष्णाच्या मूर्तीसोबत सात फेरे घेतले आणि विवाहबंधनात अडकली. रक्षाचे एमएचे शिक्षण पूर्ण झाले असून सध्या ती एलएलबीचे शिक्षण घेत आहे. तिला लहानपणापासूनच श्रीकृष्णाबद्दल विशेष ओढ होती.
अशातच एकदा तिने स्वप्नात श्रीकृष्णाशी लग्न केले. तेव्हापासून पती म्हणून श्रीकृष्णालाच स्वीकारायचे आणि भक्तीत तल्लीन राहण्याचे व्रत तिने घेतले. आई-वडिलांनी बरीच समजूत काढली पण काही उपयोग झाला नाही, अखेर त्यांच्या संमतीने शनिवारी रात्री उशीरा भटजींनी मंत्र पठण आणि सर्व रितीरिवाजांसह हे लग्न लावून दिले. लग्नाला सर्व नातेवाईक उपस्थित होते. नंतर, श्रीकृष्णाच्या मूर्तीसह कारमधून रक्षा नातेवाईकाच्या घरी गेली अन् ‘पाठवणी’ही झाली. तिथेही तिला बघण्यासाठी लोकांनी गर्दी केली होती. लग्नाचा व्हिडीओ व्हायरल होत आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"